IL SIVILOT. Peraulis e recipis

A SON DÔS PERAULIS CHE MI VAN FÛR DAI VOI: la prime e je “teritori”, la seconde “Friûlvignesiejulie”. Se o stais atents, a vegnin dopradis a machinete soredut tai giornai e ancjemò plui te radio e television. Al somee che no si puedi scrivi un articul o contâ alc cence che a saltedin fûr, cuasit che si fos obleâts a doprâlis par ordin di cualchidun. E forsit al è propit cussì, ancje se di resint un conseîr regionâl triestin al à presentât une interogazivon parcè che, seont lui, a nivel talian si dopre masse la peraule Friûl par descrivi la Regjon che si clame invezit Friul-Vignesie Julie.
O vês capît duncje che si scuen rinfuarçâ il concet, e se al convente rimpinâsi sù pai veris, si scuen butâ la frasute tal contest.
Ma a son ancje lis cuintrindicazions: se al sucêt alc a Triest o li dongje, se il protagonist a è nassût a Barcola e Longera al è triestin e vonde. Dal rest vêso mai viodude une bandiere de Regjon svintulâ suntun palaç, une scuele, un ufici dal Comun julian?
Se po dopo, une volte doprâts ducj i vocabui tant che “isontin”, “pordenonês”, “udinês”, “bisiac”, “sloven”, no i reste plui nuie, si rive a “teritori”.
Un tormenton che nol finìs plui.
Intant cun chê scuse l’agjetîf furlan si dopre simpri di mancul e soredut al somee che al rivuardi dome cui che al è te provincie di Udin.
Lait a lei cun cheste atenzion i cuotidians, lis pagjinis sportivis a son il massim, e si nacuarzarês trop che e va indevant cheste solfe.
Dut al fâs brût par discognossi i furlans, ma nissun al è obleât a compuartâsi cussì.
Insumis nomenâ “Friul-Vignesie Julie” ogni dôs peraulis no lu à ordenât il miedi. ■
L’OM DI BURI