La memorie e torne indaûr a Marquart, ma forsit la tradizion e je ancjemò plui antighe
Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. Chest event religjôs, insiemi cu la rievocazion storiche che i va daûr, ogni an al tire dongje plui o mancul un miâr di personis intal cûr dal centri storic.
◆ Tant la Messe che la rievocazion, cundut che a sedin doi events cun origjins e significât ben diferents, a rimandin ai timps li che la figure dal Patriarcje e jere centrâl in Friûl. Il Patriarcje al detignive te sô persone i podês religjôs, politic e militâr, che al esercitave intal grant teritori dal Patriarcjât di Aquilee.
◆ Cundut che la residence nominâl dal Patriarcje e fos simpri Aquilee, lui al viveve in realtât ancje in altris centris abitâts che a fasin part dal teritori dal Patriarcjât: un di chescj al fo propit Cividât.
◆ La Messe dal Spadon e ven clamade cussì par vie de frecuente esibizion, intant dal so rituâl, di une spade: intal specific, e je la spade che e je stade dal Patriarcje Marquart di Randeck, e che e rapresentave il so podê politic.
◆ La cerimonie e à dentri sedi elements tipics de Messe celebrade su la fonde dal rituâl roman, che elements che a rimontin ae epoche patriarcjâl, tant che i cjants dal Vanzeli epifanic (che a rispietin lis modalitâts dal rituâl patriarchin aquileiês) e il cjant aquileiês che al anunzie lis fiestis liturgjichis, che a culminaran dopo inte Pasche.
◆ Di impuartance primarie e je la figure dal Diacun, che al puarte cun se la spade e il preziôs Evangjeliari dal secul XV; al è propit lui che, in diviers moments de Messe, al ten tal pugn la spade, molant colps par aiar indreçâts ae int, in segn di salût o di benedizion.
◆ Ma di dulà vegnial chest rituâl strani? Magari cussì no, lis origjins de Messe dal Spadon a risultin in part fatis sù intal misteri, e tor di chestis a son nassudis tantis teoriis.
◆ Une des tesis plui increditadis, sostignude ancje dal storic Walter Tomada, e je che la Messe dal Spadon e rimonti al an 1340, cuant che il Patriarcje Beltram di Saint Genies, dopo vê botinât Cormons e assediade la ribele Gurize, al à celebrât la Messe di Nadâl tal viert.
◆ Il fat al è sucedût fûr des muris gurizanis, e al ricuarde lis impresis dai crosâts sot des muris di Jerusalem: l’event al cjape duncje un significât simbolic fuart, che si zonte al mot ancjetant simbolic di Beltram di celebrâ la Messe impugnant la spade cul obietîf di mandâ chest messaç: “Diu nus incjarie di cjapâ Gurize come che i crosâts a àn cjapât Jerusalem”.
◆ Simpri daûr di cheste tesi, di chê volte il mot di impugnâ la spade intant de celebrazion de Messe al è stât ripetût e tramandât intai secui, par rivâ fin in dì di vuê.
◆ Di origjins tant plui ciertis e resintis (1984) e je invezit la rievocazion storiche che e tache cuant che e finìs de Messe, che e ricuarde e che e rapresente la jentrade a Cividât dal Patriarcje Marquart di Randeck, intal 1366.
◆ Il corteu patriarcjâl al rive in Place dal Domo, dulà che al tache il cerimoniâl che al consist intun omaç al Patriarcje de bande des fameis nobiliârs storichis e dai cjastelans. Po dopo, il Patriarcje al ven puartât dai Ministeriâi principâi ae invistidure de temporalitât de Glesie: sentât dongje de catidre vescovîl, Marquart al ricêf dal Vicedomin Francesc di Savorgnan une spade nude, simbul dal so podê temporâl (politic). Infin, dute la Comunitât e zure fedeltât in maniere solene al Patriarcje.
◆ Cheste rievocazion maestose e ricuarde un moment di grant lustri par Cividât, tant che ogni an e je une partecipazion pardabon entusiastiche dai abitants dal lûc. La Messe e la rievocazion si fasin a buinore; il dopomisdì al è dedicât invezit al divertiment, e tra musichis medievâls, bufons, mangjefûc e svariâts intratigniments par dutis lis etâts, la zornade di fieste e va viers de fin, lassant ai partecipants tante ligrie e l’incjant che dome une citadine antighe, sugjestive e pitorescje tant che Cividât e sa regalâ. ❚
