Il risultât des elezions valdostanis al fâs rifleti ancje in Friûl

Cui tant e cui nuie. Al ven tal cjâf un pinsîr dal gjenar, viodint il risultât des elezion in Val di Aoste dulà che in pratiche tal consei regjonâl, tu cjatis dome partîts e moviments che, in maniere divierse di sigûr, si disin autonomiscj. E à vinçût la Union Valdotein, il partît storic de Val, cul 33.5% dai vôts. Metût dongje a Stele Alpine e a Federazion Autonomiste la coalizion e à tirât sù il 47.9% dai eletôrs cun 18 rapresentants tal Consei. Un di plui dai 17 de oposizion dulà che si cjatin 7 conseîrs de Union Valdotein Progresiste, 5 di Alpe (Autonomie Libertât Partecipazion e Ecologjie) 3 dal Pd. Altri doi a son grilins. Nissun elet pal Pdl. Une majorance dome di un.
La UV rispiet al 2008 e piert 14 ponts in percentuâl e la maiorance totâl e cumò cualchi acuardi cun chei che a àn formât il centriçampe e scuen cjatâlu.
Si diseve dal trop e des contradizions jenfri lis fuarcis autonomistis: di sigûr a son visions diviersis su cemût disvilupâ la autonomie, ma di chel troi no si va fûr.
Ancje il PD al somee movisi in chê direzion, viodude la liste presentade a lis politichis talianis propit cu la Union Progressiste.
I grilins a àn pierdut i 2 tierç dai lôr eletôrs: a jerin al 18.5% a lis politichis, a son al 6.6%.
Un altri segnâl al rive dal numar di eletors: a son lats a votà al 73%, al vûl dî che a decidi de lôr autonomie, i valdostans i tegnin ancjemò une vore. ❚
✒ Redazion