Il prin album: “Succederà” di Giordano Gondolo

Tra ducj i artiscj, al è però un in particolâr che si à di ricuardâ: Giordano Gondolo, in art Giò, che cul album “Succederà” al à screât la etichete “Toks Records”.
«Jo e Giò – nus conte Stefano Taboga – si sin cognossûts parcè che unîts de stesse passion: la musiche. In plui, la Ostarie Pieri Mortadele, dulà che Giordano al è ostîr, nus à tignût dongje e o sin deventâts amîs e fradis».
E cussì Giordano al publiche “Succederà”, il so prin album di solist. Un album multicolôr, cun dentri ancje il rapper Doro Gjat e il cjantautôr Simone Piva.
«Al è stât bielon a 47 agns sunâ e confrontâmi cun artiscj zovins e cetant brâfs. 17 musiciscj cun tante voie di sunâ. Pardabon une splendide esperience e une sperance pal futûr de musiche furlane» nus conte Giò.
L’album al cjape il non propit di “Succederà”. «Un toc inedit che o ai tirât fûr dal baûl de mê cariere musicâl ». Dal cd al è stât sielt ancje il singul “Io sarò lì” doprât te colone sonore dal film “Un ferragosto all’italiana” dal regjist Cristian Canderan (“Suns film”).
Nassût a Udin, Giò al scomence la sô cariere musicâl tal ’86 cui “rocketârs” Union Jack, e dopo cinc agns al passe ai Blue The King. Dopo agns dedicâts a progjets musicâi, festivals e zovins talents, Giò al puarte l’album folk e new wave “Blixxa” ae vitorie dal “Folkest 2007”. Se lu volês cognossi miôr, fasêt un salt a cjatâlu là di Pieri Mortadele, par un tai, une ridade e buine musiche.
✒ Moira Pezzetta