Nol à pierdût timp Diego Navarria, il president de Assemblee de Comunitât Linguistiche Furlane, par fâ capî a ducj che cheste gnove istituzion no à voie di jessi dome alc di decoratîf, ma che e intint anzit doprâ dut il pês de esperience dai aministradôrs che le àn volude. Sindics. Int abituade a scoltâ il teritori, a fâ cuadrâ belançs, a no zirâ il cjâf cuant che il citadin ti cîr par fevelâti: personis che no stan sieradis tai palaçs ma che a vuelin operâ a pro dai lôr paîs e – ducj insiemi – pal nestri Friûl.
Par chest la lôr vôs e à di contâ, e Navarria al à cjapât une vore sul seri il sens di cheste mission che i sindics furlans i àn afidade. All à scomençât a stiçâ discussions une vore animadis sui media locâi soredut su doi temis: la gnove leç eletorâl, l’Italicum, che e fâs a tocs il Friûl gjavant rapresentance ae comunitât furlanofone e po la tutele dal furlan di bande de Rai, ignorade dal dut inte discussion al Senât. Il dibatit su chescj argoments al è lât indevant par dut l’Istât, e no son mancjâts i colps di stilet di bande di rapresentants politics tirâts pe gjachete: ma chest al vûl dî che il president al à tirât fûr argoments che a sburtin l’interès de int. E che duncje la Assemblee e somee coventâ a une funzion precise: chê di jessi une sentinele simpri in vuaite parcè che i dirits dai furlans no finissin disfats intun biel pestefruce.
____
President, ce azions previodêso di puartâ indevant?
La leç istitutive de Assemblee no je masse clare sui limits che al à il nestri orizont: e chest al è positîf, parcè che nus permet di dâ un parê su dut ce che al inten la minorance furlane. Minorance che in regjon però, al val la pene di visâsi, e je maiorance. Su temis di caratar linguistic la Arlef e fâs za il so lavôr, nô o larìn dal sigûr a sburtâ la azion di slargjament de politiche linguistiche intai comuns previodude dal Plan Gjenerâl de Politiche Linguistiche, ma al è clâr che no si fermarìn a chest. O cirarìn di esprimisi su dut ce che al inten la tutele de nestre comunitât, e o vin za scomençât a fâlu. Cualchidun si è sustât, ma pazience…
____
La discussion su Italicum e Rai e à tignût bot par dut l’Istât. Isal plui content pal risultât mediatic o plui avilît par ciertis reazions?
O soi content parcè che la Assemblee e mostre di vê un pês. Se parlamentârs e conseîrs regjonâi a pierdin il lôr timp a dibati chescj temis al è parcè che si son rindûts cont, e e jere ore, che une comunitât furlane e esist. Nol jere un risultât scontât, parcè che fin cumò i nestris rapresentants a àn dispès fat i conts cence considerâ la identitât un fatôr diriment des lôr sieltis. Anzit. Italicum e Rai a son argoments une vore simbolics, parcè che a mostrin cemût che tante part de classe politiche, di çampe o drete che e sedi, no à nissune percezion dal furlan e dai furlans come di alc di decisîf pal so avignî e pe sô rielezion. Cussì il Friûl si pues çoncjâ in doi tai coleçs eletorâi e la lenghe furlane e pues jessi ignorade intal dibatit su la riforme de Rai. Parcè? Parcè che pai parlamentârs furlans a son minorancis di serie A, come chê todescje e chê slovene, cuviertis di acuardis internazionâi, e comunitâts di serie B, come furlans e sarts, che a àn dirit a une tutele che e va ben dome su la cjarte par netâsi la cussience. Eh no, al à di jessi clâr di cumò indevant che i furlans no tolerin discriminazions ni omissions.
____
Sui media atacs o indiference: ma la int ce disie?
In tancj mi àn clamât par sburtânus a lâ indevant cun serietât e determinazion. Ma ancje intai rapresentants politics, a dî la veretât, al è cualchidun che mi à cirût in privât par capî miôr cemût che a stan lis cuistions che o ai solevât e parcè che no si pues acetâ une situazion di cussì fuarte sotanance politiche a rivuart.
____
Par jessi crodibii, trop impuartant isal jessi autonoms de çampe e de diestre talianis?
Al è fondamentâl, no dome parcè che chest orghin al riunìs i sindics di cualsisedi orientament politic, ma ancje par conservâ la stesse filosofie che nus à sburtâts al inizi a costruî il Laboratori di Autonomie in maniere dal dut trasversâl, cu la idee che il ben dal Friûl al passe parsore di ogni ideologjie. Cheste assemblee e à di restâ libare. Se si trasforme intun imprest filoguviernatîf o di oposizion preconcete e à finît di vivi. Al è clâr che plui indevant, cuant che si struturarìn in maniere un fregul plui organizade e “democratiche”, intal dibatit interni a vignaran fûr ategjaments diferents, ma chel al sarà il risultât di une discussion che e à di madressi dal nestri confront. Inte sô nassite invezit al è impuartant che cheste realtât e resti di fûr dai zûcs politics e partitics e che e sepi simpri indreçâsi a prudelâ i interès dai furlans.
____
Cuale saraie la linie di azion de Assemblee?
Sclarî che, come che al dîs il vuestri diretôr, “doprâ la identitât e je la strade buine”. Tes emergjencis di vuê no esist ideologjie che e podedi rapresentâ un pont di riferiment: e la economie di sigûr e covente, ma no baste. I simbui de int, de identitât storiche e culturâl, dal paisaç, dal imagjinari coletîf, chei a àn ancjemò un valôr. Lu dimostrin i fats che a àn fat plui discuti in chestis ultimis setemanis.
____
Cuai?
Mi riferìs in particolâr a dôs cuistions: l’eletrodot Redipulie-Udin Sud e il cambiament da non dal Stadi Friûl in Dacia Arena. A son argoments di puartade diferente: cun dut il rispiet pai tifôs, il prin al à un impat une vore plui fuart sul teritori, sul paisaç, su la economie, su la int. No si po jessi cussì autolesioniscj di no rifleti su trop che il nestri teritori al à bisugne di une difese resonade e integrade, su trop che il disvilup al vedi di jessi sostignibil e su cetantis risorsis dal nestri Friûl che a son za stadis vendudis par un blanc e un neri invezit di deventâ fondis par miorâ la vite des nestris comunitâts. Il risultât visibil al è che l’eletrodot al à un impat pesant sul paisaç e al è un dam che al dure pe cualitât di vite de int e par ogni idee di disvilup turistic des zonis interessadis.
____
Ce pensial de bataie sul Stadi?
Mi somee clâr che e je une spie di cemût che e sta tornant fûr une identitât che la int furlane dispès magari nancje si inacuarç di vê. Però, cuant che tu tocjis determinadis formis simbolichis, alì si discjadene la reazion cence brenis che o vin viodût sul Stadi Friûl. Ancje se la famee Pozzo e je benemerite pai furlans, la int no ur lasse nancje a lôr meti in discussion la peraule Friûl. E chest al è un segnâl sclet di braùre des lidrîs.
____
Cuissà se la stesse robe e sucedarès se cualchidun nus gjavàs la nestre autonomie speciâl?
O pensi spes al 40m inovâl dal taramot che o varìn l’an che al ven. In chê volte il scjas al è stât fuartonon e al à sburtât a colp a une rinassite che e je stade prin di dut civîl e morâl. Vuê o sin daûr a frontâ un altri taramot plui platât e dificil, economic, sociâl, e ancje di valôrs: par chest, par cjalâ cun dignitât ai muarts di in chê volte e a chei che a àn tornât a tirâ sù cjasis e capanons, o vin di recuperâ lis fondis culturâls de nestre identitât, o la specialitât no sarà plui. Ni tal dirit, ni tai fats. ❚
Walter Tomada
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +