A Udin il prin torneu de dissipline
che e misture tenis, badminton e ping pong
O sin usâts a vivi il sport intune maniere une vore tradizionâl. O vin passion massime par balon, ciclisim, bale tal zei e bale a svol. Cualchidun al zonte il schi o il nadâ, lant daûr des stagjons e cualchidun altri al stâ daûr al tenis, ancje parcè che i sucès di Jannik Sinner, Jasmine Paolini e la straordenarie gjenerazion di atletis che la Italie e à metût adun intai ultins agns, e puarte simpatie e interès.
◆ Altris sports a son sigûr seguîts, ma no de masse. Al è cualchidun che al à la sgrimie di fâ e viodi dissiplinis che no son tal “mainstream” sportîf, dut câs a son bielis e interessantis. Ogni tant e ven fûr une robe gnove che, svelte, e devente par ducj une mode. E, cuissà? Intal futûr e podarès deventâ salacor une ativitât sportive fra chês principâls.
◆ La Associazion Sportive Furlane dal president Daniele Puntel e la Polisportive dai Riçs di Udin dal president Simone Cappelletti a àn decidût di meti adun il prin torneu promozionâl amatoriâl di pickleball, par fâ promozion di chest gnûf sport, inclusîf e sostignibil, sul teritori furlan.
◆ Par dâ une definizion dal pickleball si pues fevelâ di une ativitât sportive che e misture tenis, badminton e ping pong. Dal pont di viste etimologjic, la peraule inglese “pickle” e vûl dî “sotasêt”, par indicâ dut chel miscliç di verduris che si butin dentri tal vâs par no butâ vie nuie e lâ in taule in bande dai plats principâi. Cun di plui, intal timp, al è deventât une dissipline une vore inclusive, tal agâr dal “Pickle Boat”, la barcje che, intal canotaç, e je sburtade dai atletis che a vegnin refudâts des barcjis titulârs. Propit la carateristiche di fâ zuiâ ducj, come che al capite intal Baskin, e je la robe plui biele.
“Il pickleball – al conte Daniele Puntel – al è la dissipline sportive plui in cressite in Americhe intai ultins agns: al baste pensâ che, dome intal 2023, dibot cincuante milions di americans a àn zuiât almancul une volte. Disìn che al è un tenis in miniature che al bute dentri elements di padel, badminton e ping pong. La rachete e somee une vore aes padielis che si doprin sul savalon, al mâr. La balute e je di plastiche, si che duncje no si rive a dâi tante fuarce: ven a stâi che si rive a recuperâ la posizion daspò dal colp dal aversari. No son spuindis, come tal padel, e si zuie intun cjamp di tenis piçul. In Italie si zuie za a Milan, Turin, Rome e intal Friûl-Vignesie Julie al è dome un circul a Triest. Di bot, come Associazion Sportive Furlane, o vin voie di puartâ indenant la robe”.
_
Une ocasion ancje par tirâ sù un biel derby.
“Pe prime Cope Friûl, tal mês di Dicembar, a vignaran sù a Udin ancje chei di Triest, par dâ un tic di sostance ae manifestazion. O vin voie di sparniçâ une vore cheste iniziative, parcè che o crodìn che al sedi une biele pussibilitât par ducj. Il pickleball al è une dissipline che e cjale cetant ae socialitât, par vie che a puedin zuiâle in tancj. In Americhe si viodin nevôts cui vielis, parincj e amîs, oms e feminis insiemi, int grasse cun int magre e vie cussì. Al à une acessibilitât facile par ducj e al è une vore divertent”.
_
No dome divertiment: si zuie par vinci, come in dutis lis ativitâts sportivis.
“Massime intal singul, al ven fûr dut l’agonisim. E dut câs ancje intal dopli, suntun cjamp che al è compagn, si zuie par vinci, ancje se si cor une vore di mancul, si che duncje si preferìs la bande de socialitât. Sperìn che al cjapi pît e che il numar plui alt di personis al vedi voie di provâ e, po dopo, di lâ indenant”.
Da la Americhe o vin cjapât il rock’n’roll, il cine, cetantis usancis e mûts di fâ: nol sarès mâl provâ a usâsi a zuiâ ancje di pickleball. Forsit, ca di cualchi an, si fevelarà di Sotasêt e padielis, a la furlane. ❚
:::::::::::::::::::::::::::::::::::::::::::::::::::::::::::::::::::::::
Sessante agns di ativitât: al ven da la americhe
Chest sport al fo creât tal 1965 di trê personis: William Bell Jr., Barney McCallum e Joel Pritchard, inte le isule di Bainbridge, dongje Seattle, su la cueste pacifiche dai Stâts Unîts. Di chê volte, a son miârs lis scuelis americanis che a ufrissin il pickleball come ativitât fisiche pai students.
◆ In Italie, intal 2017, al è stât metût sù il prin cjamp a Tocco da Casauria, dongje Pescara, dulà che si è zuiât ancje il prin torneu. Po dopo, a son vignûts sù altris puescj, a Rome e ator pe Italie. Tant che Federico Pasquali, che al jere un zuiadôr di tenis diletant, al à decidût di provâ il pickleball deventant campion mondiâl over 50 e concuistant la amission ai torneus dai professioniscj.
◆ Il cjamp di zûc al misure 13,41 metris di lungjece par 6,10 di largjece. La rêt e je alte 91 centimetris. La rachete, che si clame pale, e à une plache solide. La bale invezit e je fate di plastiche e e pese sù par jù 30 grams, cuntun diametri di plui di 7 centimetris.
◆ A son dôs formis di zûc: individuâl e dopli. Par solit al vinç cui che al segne 11 ponts, zuiant un set ugnul o rivant al miôr di 3 sets, su la fonde dai regolaments dai torneus, distanziant i aversaris di doi ponts.
Intune situazion di paritât, sul 10-10, la partide e va indenant cence polse. In cualchi torneu al è in vore il “pont decisîf”, duncje cence estension ai vantaçs.
◆ Si pues zuiâ sedi a sotet, sedi difûr e lis scuadris a puedin jessî masculinis, femininis o misturadis. Il pickleball nol è sport olimpic, dut câs al va indenant te sô espansion in dut il mont. Cumò ancje in Friûl si pues fevelâ di une dissipline sportive cu la sô dignitât. ❚
::::::::::::::::::::::::::::::::::::::::::::::::::::::::::::::::::::::::
Ai 8 di Dicembar ducj ai riçs par gjoldisi la manifestazion
Domenie ai 8 di Dicembar, ai Riçs dongje Udin, inte palestre de scuele “Tiepolo”, in vie del Pioppo, si zuie il prin torneu di pickleball in Friûl. La prime edizion de Cope dal Friûl, come che i organizadôrs a àn decidût di clamâ la manifestazion, e sarà zuiade di atletis novei, che a vedin plui di 14 agns e che, dut câs, a cognossin lis regulis di fonde e vint tignût in man une rachete almancul une volte. Juste par che a savedin ce fâ e ce no fâ.
◆ Fra une partide e chê altre, la Polisportive dai Riçs e met sù ancje il gustâ: un past conviviâl par ducj i partecipants. Une biele iniziative par gjoldi ancjemò di plui il torneu. ❚
