Il “pes di Avrîl” chest an al è stât plui furlanist che mai: dai Gnognosaurs a Luca Manfè, ve ca cualchidun di chei che àn funzionât di plui

Pal prin di Avrîl, la zornade dai scherçs, chest an si son viodûts plui di un mateç “furlanist”. La difusion dai “social network” che a fasin in mût che ducj a puedin publicâ notiziis e alora ancje i furlans si son discjadenâts. Un dai scherçs vignûts miôr al è stât chel dal “nestri” Dree Venier, l’autôr dai Gnognosaurs, che al à publicât l’anunci che i siei dinosaurs a fumuts che fevelin par furlan a vevin fat un contrat cun la Disney. In tancj a an crodût ae notizie, difat e jere plausibile e no savìn parcè che la Disney no ju vedi ancjemò contatâts. Us conseìn di comprâ l’ultim libri, no si sa mai che nol sucedi e al valarà un grum: mandaitnus une mail par vêlu.
Al à funzionât ancje il mateç che o vin metût su la nestre pagjine Facebook: une foto dal santuari dal  Mont Grisa cu la didascalie “Madone di Mont”. Tancj i coments di proteste di bande dai letôrs che, cuant che si son inecuarts che al jere l’1 di Avrîl, si son fats une ridade.
Biele ancje chê di un grant amì de Patrie, il vincidôr di Mater Chef Usa Luca Manfè, che al anunciave di jessi deventât il cogo personâl de “star” de musiche pop merecane Taylor Swift.
Di ultim, chei di Mataran – la riviste satiriche – a an publicât la cuviertute de “Il Piçul”, une version furlane de “il Piccolo” di Triest li che si anuncie la concuiste di Triest di bande dai furlans, cun tant di show des “frecis bicolôrs”, zalis e blu. La notizie de publicazion de “Il Piçul” però, no je une sflocje: al è jessût di suplement al setemanâl “Il Friuli” cun Mataran pai 3 di Avrîl. Lu vêso cjolt? ❚
Redazion