IL LIBRI. “Il sardo: una lingua ‘normale’”

Ma esistie la lenghe sarde? Ce ise? Cuale ise la sô storie politiche e cuale la sô identitât sociâl? Cui aial reson intal dibatiment che si strissine dai agns Setante su la sô promozion e uficializazion? Ma si tratie di une vere lenghe o di dialets masse diviers tra di lôr? Isal just unificâle? Trops le fevelino? E cemût?
In chest libri si propon une voglade gnove, apassionade, documentade e clare su la situazion linguistiche de Sardegne. Par masse timp a son stâts difondûts lûcs comuns fals e ideis convenzionâls che a àn impedide une cognossince sientifiche, laiche, democratiche, serie, zovevule e ecuilibrade de lenghe storiche e di chei altris idiomis che a insiorin la Sardegne.
L’Autôr al met il letôr in cundizion di fâsi une idee su prejudizis e stereotips, dispès di origjin esterne, ma introietâts e dopo difondûts des classis dirigjentis ae societât, che a impedissin a vuê un plen recupar de diversitât linguistiche isolane. Chês che ur disin veretâts ´sientifichis´ de arcaicitât dal sart, de sô vicinance prossumade al latin, de incomprensibilitât mutuâl dai dialets, de sô ´anomale´ framentazion, de division convenzionâl e sfuarçade in logudorês e campidanês, de incapacitât di produsi tiermins modernis astrats o tecnics, de sô ´gjenuinitât´ popolâr oponude ae artificiositât leterarie, de impussibilitât di vê une leterature e un standard ortografic, a son analizadis e scandaiadis cun metodi razionâl. Une opare che e cîr di sdrumâ la idee dal sart tant che lenghe interessante dome pai glotolics: anomale, esotiche, stranie, dividude, grese, indesiderabile di un pont di viste sociâl, pericolose pes istituzions. Un lavôr che al cîr di tornâi al sart la sô normalitât di lenghe amade e fevelade dai sarts, intal rispiet di chei altris popui. ❚
C.R.