Sfuei Mensîl Furlan Indipendent
Archivi de Patrie

Il grup vocâl feminîl “Polivoice” al cjante lis nestris vilotis

Alessio Screm
Il grup vocâl feminîl Polivoice di Tierç

Un progjet che al conte
une storie antighe cu lis vôs de modernitât

La vilote, che nô o vin miôr clamâle cjant, cjantose, o ancje danze, come che si usave une volte par indicâ, e no dome, la musiche cjantade, e je une des espressions plui gjenuinis, scletis e spontanis dal jessi furlans. A dî “vilote”, si riscje di messedâle masse e di metile dongje ae vilote venite, che cun chê no à nuie ce spartî, e si dopre un tiermin postum che al sa dut di Votcent e oltri, duncje lontan de fonde carateriâl di une espressivitât popolâr dute nostrane. Al è ben vêr che aromai la peraule e je deventade di ûs comun, ma al è un pecjât dovê specificâ “vilote furlane” par une forme musicâl che e je furlane par nature, cence bisugne di cualificazions.
◆ «Fulminante, straordenarie la potence di sintesi de vilote», al scriveve – par talian – Gianfranco D’Aronco. «La antighe vilote furlane e je curte come la frece, come le bussade, come la muardude, come il sangloç e come il ridi», parafrasant Gabriele D’Annunzio.
Su chest patrimoni imens, che al è sigûr siôr di plui di mil cjants, che a son dut câs dificii di numerâ tignint cont di dutis lis variantis, il grup vocâl feminîl “Polivoice” di Tierç al à metût sù un biel progjet intitulât “Vilotis… une sere par furlan!”, che al puarte indenant dal 2022, nassût di une idee de diretore artistiche Barbara Di Bert e des coristis dal grup.
◆ Stant che a son stadis soredut lis feminis a puartâ indenant la usance di movi la vôs sui viers, la plui part otonaris e par solit dentri di une o massime dôs cuartinis, la lôr iniziative e scomence metint in sene une fantate furlane, che si conte e che e conte la furlanetât intes liendis de sô storie personâl. Une pueme, une nuvice, une mari che e cjale indaûr ae sô vite inte suaze dal Friûl di un timp, compagnade dal cjant des vilotis rielaboradis di compositôrs come Orlando Dipiazza e Marco Maiero.
◆ Lis vilotis “spontanis”, nassudis de vôs vive dal popul, a son anonimis o vignudis fûr di istint dal “cjantôr poete” dal paîs e par solit di lui no si conserve, o no si è volût conservâ a pueste, il non. Chestis cjantis a son tramandadis di gjenerazion in gjenerazion cun dutis lis modificazions dal câs, o cun incursions di gnovis espressivitâts. Dongje di chestis, dut câs, a esistin ancje chês di autôr, cemût che si dîs, che a nassin cuant che musiciscj, compositôrs, etnofoniscj e etnomusicolics a tachin a cjapâlis sù, metint dentri alc di gnûf che al rive de fantasie dal lôr inzen. A vegnin fûr ancje di rangjaments corâi, o inte forme di musiche di salot di un ciert spessôr autoriâl, o cun gnovis scrituris par gnovis composizions. Cussì, ai cjants de tradizion si son zontadis lis formis cultis de musiche popolâr, dispès confondudis cu lis primis par vie de abilitât dai lôr autôrs, tant che Luigi Garzoni, insiemi a Tite Marzuttini, che a son di meti tra i prins di une liste lungje di nons.
◆ Plui tart la vilote si è declinade in dutis lis formis pussibilis: cjantautorâl, pop, rap, funk, par big band, jazz, blues e vie indenant, cirint e cjatant simpri une sô atualitât, no simpri cun risultâts di rimarc. La forme origjinâl e origjinarie e reste pardabon simpri la miôr.
◆ Al va dit che i argoments tratâts plui dispès, za de sô nassite, a son chei dal amôr, de passion, de sblefe, dal sintiment popolâr, dut calât però intun clime e intune ambientazion contadine e pastorâl che vuê al è dificil che e rivi a cjatâ un riscuintri reâl, par vie che o sin mangjâts di une modernitât che no nus fâs plui vivi la campagne e la mont in maniere naturâl. Par chest dut al riscje, ancje il cjantât, di deventâ artificiâl rispiet a ce che prime al jere spontani. Se une volte si cjantave in ogni ocasion e in ogni lûc, cumò se no tu lu fasis suntun palc o intun festival o dentri di un conciert, ti cjapin par cjoc o par mat.
◆ Par chest, la sensibilitât dal grup corâl feminîl “Polivoice” e à fat atenzion a chest aspiet, contant cu la nestre musiche, midiant di une persone “redivive”, une storie che e merete di jessi contade, metint in lûs ancje i apuarts di compositôrs furlans di nivel, tra Nûfcent e contemporaneitât. Al diseve ben Bindo Chiurlo: «Lis vilotis a son cence dubis la part plui origjinâl de leterature popolâr dal Friûl».
Il spetacul che al propon il grup “Polivoice”, si indrece a ducj i Comuns e lis realtâts culturâls dal Friûl che a àn a cûr la storie e la tradizion de nestre tiere, tant melodiose e cjantarine. Partant, cui che al è interessât, al è ben che al scrivi une mail a coropolivoice@gmail.com. ❚

Gnovis / “Feminis furlanis fuartis” di Erika Adami a vicino/lontano e al Salon internazionâl dal libri di Turin

Redazion
La Patrie dal Friûl e segnale doi apontaments che le viodin protagoniste cul libri “Feminis furlanis fuartis” di Erika Adami, che e fâs part de golaine “La machine dal timp”. Te suaze dal festival vicino/lontano, rivât ae vincjesime edizion, Erika Adami e moderarà l’incuintri “Feminis. Talents di no strassâ” che al nas des esperiencis contadis […] lei di plui +

Comunicât / Cungjò, Aureli. Nus lasse un grant omp, Aureli Argemì, che si è batût pai dirits dal popul catalan e par chei di ducj i popui minorizâts. Il comunicât in lenghe catalane e furlane.

Dree Venier
BARCELONA Aureli Argemí, fundador i president emèrit del Centre Internacional Escarré per a les Minories Ètniques i les Nacions (CIEMEN), ha mort aquest dilluns als 88 anys, segons ha informat l’entitat en un comunicat. Nascut a Sabadell el 1936 i llicenciat en teologia a Roma i París, va ser monjo de Montserrat, va formar part […] lei di plui +

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +