IL GRANT LUNARI DAL FRIÛL. Jugn

IL SORELI, LA ATMOSFERE, LA NATURE
Il soreli al tocje la sô altece massime tal cîl setentrionâl cul solstizi di Istât (21 di Jugn) rivant ae sô massime declinazion positive (+23°27’) rispiet al ecuatôr celest. Di culì al torne a cjapâ la sô aparente parabule dissendente viers l’emisferi austrâl, li che si fermarà (solstizi di Invier) ai 21 di Dicembar. La nature si cjate al so massim svilup e sflandôr, lis pomis a stan madressint e il forment al scomence a jessi cjapât sù. Lis zornadis a son une vore cjaldis e lis plui lungjis dal an, intant che lis gnots a son clipis e curti, claris e incantesemantis. Al tache il lunc Istât.
VORIS DAL CICLI AGRARI
Une volte al lave indevant l’arlevament dai bigats. Grandis voris tai podês e tes vignis, li che si fâs la netade di Istât des vîts e dai pomârs dal sfueam in plui pe miôr maturazion des pomis; lis vîts a vegnin sborfadis cun periodicitât cun sulfât, di ram cuintri lis malatiis e parassits. Tai cjamps si sesele il forment, intant che la blave e va indevant a cressi (a S.Pieri il sorc al tapone il puieri). Tai orts lis feminis a semenin o a tornin a plantâ jerbutis, puars, carotis e a semenin salatis, lidric, latuiis variis, cudumars, puars, brocui, cauliflôrs, râfs e fasûi. Tai zardins lis plantis in vâs a vegnin sistemadis tal viert e esponudis al soreli, a vegnin taiadis lis cimis ai rampighins, svangjade la tiere sot dai rosârs, radâts i tapêts di jerbe. A vegnin cjapadis sù lis pomis dal mês e cun chestis a vegnin prontadis lis primis marmeladis. I prins cjalts a puedin vuastâ il vin te cjanive e alore il contadin al previôt cui trataments di pueste e cu lis precauzions colaudadis. ❚
Mario Martinis
***
RINGRAZIAMENT AL AUTÔR
Gjavât fûr di “Il grant lunari dal Friûl. Sants, fiestis e tradizions dal cicli dal an” (Pasian di Prât, 2012): o ringraziìn l’autôr pe disponibilitât e pe colaborazion ❚ ✒ Redazion