Sfuei Mensîl Furlan Indipendent
Archivi de Patrie

Il gnûf moviment politic rivât te galassie dal furlanisim: Patrie Furlane. cu la adesion di Federico Simeoni, conseîr provinciâl ex Front Furlan

............

Un gnûf “front”, daspò la sbregade cun chel vieri. Al nas Patrie Furlane, moviment politic che al tire dongje, dal moment, une ventine di esponents, pal plui chei lâts vie di Front Furlan e di Identitât e Inovazion. La notizie e la scree dal gnûf moviment autonomist e je buride fûr daspò il divorzi ecelent di Front Furlan di Federico Simeoni, il conseîr provinciâl che doi agns za fa, cul so “Vonde Monadis” al cjapà un seç a Palaç Belgrât (12.547 preferencis, il 5,74% dai vôts, risultâts storic par un grup che al coreve di bessôl e cence aleancis cui grancj partîts). Po il rapuart cun Front Furlan si è consumât. E l’unic elet nus à spiegât: “Si son metûts tal cjâf di jessi une sorte di M5S furlan, lassant de bande la cuistion identitarie e imbraçant une contestazion totalizant al sisteme. O varès scugnût domandâ ogni dì lis dimissions di Fontanin e cjapâ posizion contrarie su dut e ducj. Al jere impussibil”, al comente Simeoni. “Mi soi metût di traviers plui e plui voltis, dentri dal partît. La gnove linie e à fat lâ vie tancj aderents a Front Furlan, pûr di no inviâ cavîi. Jo e chei che a sostignivin la cuistion de identitât o sin finîts in minorance al congrès di Setembar. L’ultin diretîf mi à metût denant di un aut-aut: o o seguivi lis indicazions, o o jeri fûr. Jo o ai firmât lis dimissions in blanc e cualchidun al à cjolt chel toc di cjarte e lu à puartât in Provincie, al protocol. Al jere scrit che mi dimetevi di conseîr provinciâl. Chest no mi à plasût e o ai vût miôr lâ vie”.
LA ADESION
E duncje cumò l’abraç cun Patrie Furlane. Ai 14 di Mai, il segretari dal partît Oscar Olivo lu à fat savê cun tant di comunicât stampe e foto di Simeoni che al firme la adesion. Patrie furlane e Simeoni a vevin za colaborât di resint. Par esempli, presentant la “Letare vierte ai candidâts a Governadôr dal Venit”, in merit aes lôr posizions sul tornâ di Cint e Sapade al Friûl. Sul program de gnove fuarce politiche, nus spieghe Simeoni: “O volìn prudelâ la autonomie furlane e determinâ un cambi di ategjament trasversâl, propositîf e di racuardi des tantis istancis economichis e sociâls presintis in Friûl. O tirarìn dongje dutis lis fuarcis e lis personalitâts interessadis a difindi chescj aspiets. Par chest, o sarìn pronts e atîfs sul teritori”. Obietîf al è chel des prossimis elezions regjonâls. “O sin a pene nassûts, ai 3 di Avrîl o vin depositât il nestri Statût, cumò o stin distribuint i incarics operatîfs dentri dal moviment. Ma o stin organizant ancjemò manifestazions par fâsi cognossi e par incressi il nestri sindicât teritoriâl. Ai 6 di Jugn o sarìn a Sant Zorç de Richinvelde par memoreâ il Patriarcje Bertrant di Aquilee, tal inovâl de coparie”.
UN VOLI ATENT AE MITTELEUROPE
Contats cun altris fuarcis politichis? “O sin trasversâi a ducj. O vin vût incuintris e moments di confront cun sindics e esponents dal mont autonomist, o vin fevelât ancje cun Fontanin e cun cualchi eurodeputât. Po o vin inviâts contats cun politics di Slovenie, Carinzie e Baviere. Chest par vie che plui che ae realtât taliane o volìn cjalâ a chês dal Centri Europe. E je cu la Mitteleurope che il Friûl si è relazionât in passât e si relazione vuê dal pont di viste economic”, al rispuint Simeoni.
Su la aree politiche di colocament – centri drete o centri çampe – Patrie furlane e vûl jessi super partes. No viodin spazis di condivision ni di ca, ni di là, ma si dîs sigure che si insinuarà in chei lassâts libar dai doi schiriaments storics. “O volìn jessi sul teritori, fevelâ cul teritori, par rapresentâ e sostignî i furlans e il tiessût economic de nestre Patrie”. ❚
Oscar Puntel

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +