Il furlan a scuele, nissun pas indaûr

Prime di dut ancjemò une volte si à di ringraciâ dutis lis fameis che a àn dite di sì al furlan te scuele. No è stât facil, viodudis dutis lis bufulis e la contrarietât mostrade di tancj tes istituzions, tai ambients sindacâi e soredut de bande di chei che a continuin a fevelâ di doprâ l’inglês, cuasi come che une robe e ledi cuintri di chê altre. Sflocjis, ma no sin chi a discuti di chest. Al è avonde ce che al è stât scrit su cheste cuistion, e no vin voie di tornâi parsore.
O visìn invezit chei professôrs – e soredut chei dirigjents scolastics – che, numars ae man, a son lâts cuintri de aplicazion de leç: un câs su ducj, chel di Gardiscje dal Lusinç. Nol è pussibil che nissun al vedi presentade la domande pal furlan, alc nol va. No savìn se cualchidun in presidence al à dismenteade la modulistiche, se lis fameis a son stadis informadis o se invezit a son stadis sburtadis a no fâ nuie.
Lant a viodi lis tabelis, al salte tai voi ancje Udin e soredut l’Uccellis, un istitût linguistic che si da une vore di sflocje pe sô ufierte multilengâl e dulà che il furlan nol ven insegnât par nuie.
Si visaiso l’an passât di chê mestre che vie mail e invidave i gjenitôrs a no iscrivi i lôr fruts aes lezions? Dome un câs singul o une pussibile tindince? O denunciarìn ognidune di chestis sporcjis manovris sedi al ufici regjonâl scolastic che ae Cort dai Conts, par dams. E sì, parcè che lis robis a son claris: la scuele in Regjon e à il dovê di prontâ la ufierte didatiche par il furlan. Tancj duncje i câs di tignî di voli.
Da pît, po dopo, la nestre ricognossince e va aes fameis furlanis, e un bon lavôr a ducj chei insegnants che si prontin pal gnûf an: o vês tra lis mans un toc impuartant dal passaç di une gjenerazion a di chê altre, cun ducj i valôrs che ognidune si puarte daûr.
Par ultin, ma al è il plui impuartant, un mandi di cûr a chês fantacinis e a chei fantacins che a podaran fevelâ la lôr marilenghe dentri te lôr scuele. ❚
✒ Redazion