Sfuei Mensîl Furlan Indipendent
Archivi de Patrie

Il doman al è tes nestris mans. No je retoriche ma disvilup pes nestris impresis

............

La batude e je cetant cognossude. Tal timp de crisi dal Pci, i vertiçs dal partît a àn clamât un congrès straordenari par capî lis resons de disfate. Il segretari al à començât: “Compagns, al è rivât il moment di fâ une autocritiche profonde e sclete. Dulà vêso falât?”.
Par chel che al somee, ancje intal cjamp de economie – dulà che i analiscj intal cors dal ultin deceni a ‘nd àn faladis tantis di plui di chês che a ‘nd àn intivadis – lis robis no funzionin in maniere tant diferente.
La crisi e à sdrumadis tantis teoriis, dimostrant la ilusorietât intal mût plui crudêl, vâl a dî cu la pierdite di puescj di vore e cul colâ di setôrs intîrs (che si pensi ai intermediaris imobiliârs, ai consulents finanziaris, ai traders, a tantis ativitâts conetudis ai servizis). La crisi e à invezit tornât valôr a chê capacitât dal fâ che intai ultins agns e jere stade cjalade un pôc tant che une componente di serie B intal procès di creazion di cressite e disvilup. Chê vision che, in sintesi estreme e in mût un pôc “razist”, e assegne un predomini des fassetis blancjis sul “savê fâ”, su la creature artesane.
Che il teme al fos centrâl e che la vision dal predomini di une cierte “tecnocrazie” e fos inadate a interpretâ i timps, si lu veve intuît za agns indaûr cuant che Gianpietro Benedetti, president de Danieli, a sun di acuardis cun Universitâts e Politecnics nazionâi prestigjôs al rilançave il probleme de carence di racuardi tra universitât e imprese. Une denunzie che Sergio Cecotti, chê volte president di Friuli Innovazione (si jere inte Sierade di trê agns indaûr) al veve sclarît daurman, rilevant che Benedetti al veve fat “un discors tant plui sofisticât, partint di une constatazion storiche: che il disvilup de industrie in Friûl intal secont Dopovuere al è nassût de cualitât straordenarie dai nestris artesans e dai nestris operaris intal lavôr manuâl. La grande sfide pal sisteme de istruzion e je chê di garantî dal alt la trasmission di chest patrimoni intune epoche là che nol pues plui jessi trasmetût dal bas, midiant di un passaç gjenerazionâl sempliç”.
“La sfide e je alte – al scriveve, comentant lis declarazions di Cecotti inte interviste su “Il Gazzettino” Riccardo De Toma -: si trate di rinovâ chel humus di laboriositât e di capacitât manuâl – la inteligjence dai eletriciscj, al disarès Paolo Conte – che al à consintût il disvilup dal nestri manifaturîr”.
A puartâ “plui in là” cheste vision al è stât in timps plui resints – e a dî il vêr compagnât de disatenzion locâl che e je cundizion necessarie e indispensabile a conferme dal “nemo propheta in patria” – Stefano Micelli, furlan doc, docent di Economie a Ca’ Foscari e autôr (il test al è saltât fûr intal 2011) di un libri che al è deventât un vêr e propri câs: “Futuro artigiano. L’innovazione nelle mani degli italiani”, rivât ae cuinte edizion in Italie, prossim a jessi tradusût intai Stâts Unîts e cun contats za inviâts pe publicazion in France, dulà che al varès di jessi acompagnât di une “case history” locâl. Intal so libri, Micelli al cite la parabule di Matthew Crawford. Laureât in fisiche, PhD in Filosofie politiche, al lasse un rûl prestigjôs intun “think tank” politic, par vierzi une oficine di riparazions di motocicletis e par fâ un lavôr che lu apaie e lu gratifiche pardabon. “Nô o sin vitimis di un concet, chel di ‘economie de cognossince’, che si fonde suntun assum cuasi ideologjic – al à sclarît Micelli intune interviste -: vâl a dî che dome la cognossince formalizade e je impuartante e che cheste no à a ce fâ ni cu la tradizion, ni cu la manualitât. O vin imbraçât il supuest che la uniche cognossince impuartante dal pont di viste economic e je chê sientifiche, di stamp gjenerâl e astrat”.
Analizant i câs di sucès rapresentâts di realtâts tant che Bottega Veneta, Geox, Zamperla, Micelli “al conteste” la interpretazion che si à dât fin cumò di inovazion e di ricercje: “Nô – al dîs ancjemò – o sin lâts daûr in maniere acritiche ae idee che e esistès une cognossince astrate e sientifiche che si tradûs in maniere automatiche in valôr economic. Al è plui complicât di chel che o pensavin. E je tante inteligjence intal fâ, massime cuant i prodots a son pensâts par clients cun domandis specifichis o che a àn di evolvi in curt intal timp”.
Secont Micelli, plui che di trasferiment tecnologjic, al bisugnarès fevelâ di osmosi, tecniche e tecnologjiche, o ben messedâ lis abilitâts artesanâls cu lis competencis industriâls, lis capacitâts dai managers e dai tecnolics cun chês “straordenariis, dai tecnics e dai artesans”. Une ricete che e vierç grandis sperancis ancje pal Friûl, che ancjemò vuê al svante realtâts di nivel une vore alt e che a rivin a mantignîsi competitivis a nivel globâl, des “multinazionâls di sachete” sul stamp de Danieli, aes ativitâts di caratar artesanâl o Pmi intai setôrs de mecaniche, dal mobil, de cantieristiche, dal agroalimentâr: veris ecelencis, buinis di inovâsi mantignint un propri caratar particolâr e distintîf.
“Personalmentri – al sclarive Cecotti – o ai vût mût di tocjâ cun man la diference tra un muredôr furlan e un muredôr american. Nol è un câs se inte cjarpentarie i furlans a àn metût impins aziendis enormis in dut il mont”. “Chel che e à di fâ la nestre economie al è di resonâ propit su la saldadure tra il secondari e il terziari, tra servizis e industrie – al sosten ancjemò Micelli inte interviste citade -. Vê tantis fabricutis aromai al covente a pôc: tant plui util cumbinâ lis competencis artesanâls che ancjemò o disponìn cun chês dai inzegnîrs, dai ricercjadôrs, dai miedis, dai esperts di comunicazion. Un cocktail cussì al pues gjenerâ l’inverisimil, a cundizion che la nestre culture e ricognossi il savê fâ tant che un vêr savê”.
I ingredients ju vin za ducj in cjase, i imprescj che a coventin ancje. Nol reste che metisi in vore. ❚
✒ Linux

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +