IL FERÂL. Nadâl: podevial no vignî a viodi di nô?

Une maniere diferente di lei, capî e spiegâ ancje il Nadâl. Diferent dai solits resonaments che tante part di glesie e di predis a fasin. Al jere tipic di pre Antoni lâ a cirî altris motivazions, altris significâts, salacor mancul tradizionâi, mancul scontâts, ma che a rispuindin miôr ai interogatîfs dal om di vuê. La incarnazion di Jesù, che o ricuardìn tal Nadâl, no je sucedude tant par comedâ lis nestris falopis e tristeriis, ma soredut par un at di amôr gratuit, di condivision solidarie cu la umanitât che naturalmentri e je debile, precarie, fragjile. E cussì e à di acetâsi. (pre Roman Michelot)
Cun chescj miei resonaments o çavariaments, cence ordin liturgjic o logjic ma dome cul intent di fâmi lûs cul ferâl de Peraule, o soi rivât al misteri dal Nadâl, dai rapuarts fra Diu e l’om, di une ufierte fate e no acetade, di une dibisugne estreme dal om che Diu al vegni a puartâi la salvece e di un istint no mancul fuart di sierâi la puarte.
Cheste conflitualitât le piture une vore ben il vanzeli dal Verbo, chel de messe grande (Zn 1,1-18). Un contrast fra lûs e scûr masse net par no pensâ che al sedi sfuarçât, come une tesi di dimostrâ.
La tesi di puartâ Diu e il so amôr, e chest no mi displâs, e la antitesi di dâi jù al om e a la sô tristerie croniche, e chest no lu aceti. Se l’om al è cragnôs, vuarp, ingrât, stupit, carogne, cui lu aial fat cussì? No podevial fâlu un pêl miôr? I teolics a disin che l’om al è libar.
Ma se al è libar dome di finî di sassinâsi, ce libertât aial? E cheste libertât ise un regâl o une condane?
Par chest no aceti plui ciertis piuladis nataliziis suntun Diu sfortunât che al ven jù e si cjate dut sierât e ciertis invetivis cuintri dal om pecjadôr che si siere cul clostri par no lassâ jentrâ Diu, la sô lûs e la sô gracie. E jù a vaî su Diu, biât, invezit di vaî sul om, inmò plui biât.
No si onore il pari e la mari disint mâl dal fi, parcè che nol è un onôr pai gjenitôrs vê un fi stupit o cjochele o bintar. Se mai ur ven il scrupul se a àn fat ben a metilu al mont. Il mâl che al è tal mont nol è il faliment dal om, o no dome il so, ma prin di dut al è il faliment di Diu. Tignìnlu a ments, prin di plombâ fûr monadis a sbreghebalon.
O ai pensât tant a chest misteri dal Nadâl e o ai concludût che Diu nol à fat propit nuie di speciâl a vignî tal mont. Al à fat ce che a fasin ogni pari e ogni mari di sintiment denant di un fi che al patìs e al à dibisugne.
Crist al à cjatade sierade la puarte de locande. Ma trope int, ancje o soredut in dì di vuê, no cjatie sieradis dutis lis puartis? I siei di cjase no lu àn volût. Ma trops gjenitôrs, dopo di jessisi lambicâts une vite interie, no si cjatino suntune strade, cence un afiet, cence agrât, cence nuie? Ce dî di chei gjenitôrs che adiriture a riscjin di jessi copâts dai fîs?
Par chel o dîs che Crist, se al è pari, nol à fat nuie di straordenari vignint a viodi di nô. Lu fâs cualunche mari furlane o taliane, ancje se no va a messe, cuntun fi malât, drogât, disordenât, di bessôl. E no va in cjase dal fi par vê i compliments, ma par puartâi il confuart e il jutori de sô presince. E cuant che e vierç la puarte e e viôt dut chel davoi, no tache a berlâ cuintri dal fi ma e cjape scove, peçot e aghe e si met a netâ. Po e impie il fûc, e prepare alc di cjalt e si sente dongje dal fi a servîlu. Parcè che al è so fi, lu à fat jê e si sint in cualchi maniere responsabile des sôs penis.
Se Diu al è bon, se il mont al è cjase sô, nol è nuie ce maraveâsi che al sedi vignût a stâ cun nô.
Al sarès stât di maraveâsi che no lus ves fat. ❚
Antoni Beline, Cirint lis olmis di Diu 1, pagj. 24