Identitât furlane intun mont globalizât (pontade nr. 1)

L’argoment dal Ferâl di pre Antoni che o presentìn chest an, lu considerìn impuartant e di atualitât. Al è un intervent che al à fat a Vençon tal 2002. Lu vin rigjavât di une regjistrazion vocâl. Imagjinait che nus feveli. Si trate di un test inedit che al pues fâ dome ben ai nestris letôrs e a ducj i furlans.
pre Roman Michelot
No ai aponts parcè che no sai ce che o ai di dî, no ai un biliet, no ai fat cualchi note.
Jo o soi un solitari. O fâs part di chei che a cirin, in chest nestri mont imberdeât, une strade, un lusôr, a cirin di esisti: resisti par esisti.
Il teme al è: identitât intun Friûl globalizât, mondializât o mondiâl. Jo no soi un espert. O dîs peraulis cussì parcè che al è un teme che jo lu sint. Jo o vîf la dificoltât a restâ me stes intun mont che mi gjave simpri, di continui, i ponts di riferiment, come che e fos une pale sot i pîts che mi gjave simpri il savalon, come cuant che si jere tal Tiliment là che la corint e menave vie; tu vevis di stâ atent, li tu sintivis propit che ti mancjave la tiere sot. O ben, al è come se zirant di gnot tu ti cjatassis cu la segnaletiche dute gjavade: no si sa plui di ce bande che si va. Si cjatìn come a lâ in coriere, cence autist o cuntun autist cjoc: dulà lino? Ma! Cuant tornìno? No sai! Provait a gjavâ la segnaletiche: e je une robe kafkiane. Il viaç de vite al devente une alucinazion, e nô o stin lant indenant cence segnaletiche, a stan gjavantle o a metin une segnaletiche artificiâl, false. Ti disin di lâ par là… Al è come che al fasè Colombo che al leve a soreli jevât lant a soreli a mont; ti mandin a soreli a mont par lâ a soreli jevât.
Al è un mont che nus pilote, e chi la identitât e je impuartante. Jo aio di fâ part di chest pelegrinaç di disperâts? Aio di separâmi, aio di resisti, ce aio di fâ? Ma! Aio di lassâmi menâ vie de corint?
Identitât. Secont me, bisugnarès fevelâ plui di identitâts, al plurâl parcè che ognidun di nô al à plui dimensions: jo o ai une identitât parcè che o soi di Vençon; o ai une altre identitât parcè che o ai studiât; o soi predi; o soi di chê famee e no di une altre; o ai chê ereditarietât e no une altre; o ai chei guscj e no altris… A son plui relazions, a son plui dimensions, a son plui lidrîs e ogni lidrîs e fâs part di cheste identitât plurâl. Duncje no sin une identitât, ma o sin plui identitâts, o sin pluralitât. Bisugne acetâ chê robe chi, no vin une sole briscule, ma o vin un zûc di brisculis al plurâl, e chi e sta la bravure e la inteligjence di savê jessi une rêt simpri plui slargjade, simpri plui profonde, simpri plui armoniche.
Se la vite e nas di une relazion, plui a ‘nd è relazions e plui a ‘nd è vite. La relazion e je vierzisi, no sierâsi. Se jo mi sieri, no ai relazions. Duncje ancje la difese di une identitât che si siere, oltri che jessi une sielte stupide, e je destinade a murî. E je une sielte suicide parcè che o resti cence ossigjen, no rivi a riprodusimi. Al è dut un zûc tra trop aio di vierzimi e trop aio di sierâmi? La identitât secont me no va difindude, nol è nuie ce difindi. E je di vivi. Jo o soi chel che o soi. O ai di cjatâ il gno puest in chest mont calcolant che jo o soi un puntinut, che o fâs part dal ream minerâl, dal ream vegjetâl, dal ream animâl, dal ream uman, o soi un dai cuatri cinc miliarts, o soi unic. Duncje o ai un valôr infinît, ma o soi un puntin. O soi grant e insignificant, o soi dut e o soi nuie. Al è chest contrast che ti sbale un pôc. ❚
(1, al va indevant)

pre Antoni Beline