IL FERÂL. I furlans e il templi

O scomencìn chest gnûf an dal “Ferâl”, la rubriche dedicade a pre Antoni Beline, riproponint une sô riflession a pontadis. Il test complet al à il titul “I Furlans e il templi” e al presente un resonament sul rapuart dai Furlans cu la fede e la religjositât.
pre Roman Michelotti
***
(tierce pontade)
[…]
1. IL TEMPLI
(Cuant che o feveli dal templi, o feveli in pratiche di gran part o di dut ce che al rivuarde la vite e la struture de nestre religjon catoliche).
_Implant cultuâl
Fevelant di templi si scuen riferîsi a dut chel implant di funzions, di messis, di gjespui, di devozions che a tignivin impegnât il predi dut l’an e a fasevin in mût che dute la vite dal paîs e ziràs ator de glesie. Nol è un câs che la vite lavorative de int si vierzès e si sieràs cu l’Ave Marie de buinore e cu l’ore di gnot o il Deprofundis e che ancje i proverbis peâts a la vite di ogni dì, prevalentementri o esclusivamentri agricule, a fossin peâts al santorâl e al lunari liturgjic plui che no a chel astronomic. E i sants che la biade int e riscjave cualchi palanche par vê chês graciis minudis che i permetevin di tirâ indenant a jerin i sants specializâts su lis malatiis dal cuarp e su la stale: sant Antoni e sant Aroc pai nemâi, sante Ane pes parturientis, sante Luzie pai vôi, sante Palonie pai dincj, sant Antoni di Padue pes robis pierdudis e vie. No rivarès a imagjinâmi une statue o un altâr par sante Marie Goretti o par une des santis muiniis che a àn inflazionât cheste ultime part di secul.
_ Personâl deputât pal cult
Ma il templi al cjape dentri soredut il personâl deputât pal cult, vadì i predis, che tante part a àn vût te storie dal nestri popul, al pont che no si pò scrivi la storie dal popul furlan cence fevelâ dai predis, des lôr ideis e dal mût che a formavin o a deformavin i cristians. Dongje di lôr e parsore di lôr a jerin e a son i vescui e lis altis gjerarchiis, ma normalmentri la int ju sint lontans e ininfluents, al pont di identificâ la struture e l’autoritât de glesie cul plevan. E ancje il plevan, soredut i plevanons prime dal nivelament dal vescul Nogara (1928-1955), a identificavin la glesie cul paîs che lôr a passonavin e che si sintivin vescui e papis. Une colegance fra predi e int che in Friûl e à vude la plui alte e splendide realizazion, cun ducj i limits e i difiets di un rapuart totâl e esclusîf.
Al è evident che la modernitât e à zovât a la int a liberâsi o a slizerîsi de sotanance dal predessam e che il podê dal predi di une volte, che intun paîs al faseve di mestri, di sensâr, di politic, di miedi, di nodâr, di consulent familiâr e vie, vuê nancje no si à une idee. O savìn però che certis imposizions, costrizions, inibizions, pressions psicologjichis e morâls a durin tal timp e a son duris a sparî, come che e dimostre la teorie dai riflès condizionâts di Pavlov. Sta di fat che ancje te bondance e te massepassuderie di vuê o vin pôre de miserie e te clime di areligjositât o di ateisim pratic di vuê no sin libars di certis pôris ancestrâls. Al è come se certis sensazions o pôris psicologjichis, che a àn compagnade e segnade par secui la nestre storie, si fossin somatizadis, rivant a segnâ e a condizionâ ancje chei che no lis àn provadis diretamentri. Se si cor tant dai strolics e la susperstizion e galope, al vûl dî che il vueit lassât de religjon tradizionâl nol è par nuie colmât ma che anzit si lu sint ogni dì di plui. […] ❚ (al va indevant sul prossim numar)
pre Antoni Beline