Sfuei Mensîl Furlan Indipendent
Archivi de Patrie

IL FERÂL. Emigrants pe fede

............

Avost, timp di feriis e di polse; timp che ancje i nestris emigrants furlans a tornin dongje cualchi zornade tal lôr paîs a respirâ un fregul di aiar di cjase. Culì pre Antoni al pense ai missionaris furlans che a àn emigrâ, a son partîts pal mont plui che a fâ i colonizadôrs e a puartâ la fede, a cirîle e a scuviergile tai gnûfs popui dulà che si intivavin a lâ, a judâ cun tante umiltât e umanitât la int dal puest a scuviergi il tesaur platât tal lôr teren, a fâur sintî che la fede e à ancje il savôr de lôr tiere, il colôr dal lôr cîl, il profum dai lôr flôrs, la musiche dai lôr cjants.
pre Roman Michelotti
O sai che chescj tentatîfs di cirî lis olmis di Diu tal nestri mont e timp a vegnin lets ancje di chei furlans, passe doi milions, che a son lâts a cirî furtune su lis stradis no simpri fodradis di rosis dal mont. Sisilis ch’a àn fat il grant salt di là dal mâr, fueis e semencis strissinadis lontan dal aiar crût de dibisugne e de puaretât.
Ma il gno pinsîr al va, par cheste volte, ai furlans che no son lâts pal mont a cirîsi il pan ma a puartâ il pan, il pan da l’anime. Emigrants ancje lôr, ma emigrants pe fede.
Mi rive ogni tant, soredut sot fiestis, cualchi lôr rie augurâl. Dai tancj o ricuardi pre Scjefin di Possec, dibot gno confinant, Enzo Missoni di Mueç, pre Carli Trep ch’al à vude la venture di passâ cualchi an in seminari cuntun paian come me prime di frontâ chei de Indonesie, e tancj altris des cuatris parts dal mont.
A disin che la partignince a un popul e je une sorte di sigjîl o di marcje che ti segne par simpri. Di fat i furlans a restin furlans, cu lis virtûts e i difiets tipics, ancje lontan dal Friûl e ancje tes gnovis gjenerazions. O speri, e mi auguri, che la stesse regule e vali ancje pai missionaris, oms e feminis, che la vôs mistereose e amorose di Diu ur à domandât, o comandât, di lassâ la tiere e la parintât e la cjase di lôr pari, come Abram (Gjen 12,1). E lôr a son partîts come che ur veve dit il Signôr e là che lui ju veve distinâts.
Te tiere che a son rivâts, no son rivâts par prins, come Colomp o i colonizadôrs. Prin di lôr al è rivât il Signôr, lui che al semene la sô gracie framieç di ducj i popui e ch’al à un progjet plui grant e larc di chel de glesie. Pa la cuâl no rivin a puartâ il Signôr o la veretât e nancje la civiltât. Parcè che Diu al à semenât e al semene in ducj i popui e in dutis lis culturis. Lôr a àn prin di dut di metisi a cirî, cun umiltât, chestis olmis dal passaç di Diu, chestis “semencis di santitât” che al fevelave ancje sant Augustin.
In chest a son judâts, o crôt, dal jessi furlans. Parcè che il furlan, pardut là ch’al è lât, al à palesade grande umiltât e disponibilitât. Nol à pratindût ch’a fossin chei altris a gambiâ, come ch’a pratindin tancj  prepotents ancje chi di nô, ma si è adatât a la gnove clime, onorant la gnove culture cul tacâ a fevelânt la lenghe. I nestris emigrants, pal ben de famee, si son adatâts a fâ dutis lis voris, ancje chês ritignudis pôc golosis e umiliantis. Parcè che nol è nuie di umiliant cuant che si lavore par passi i fîs. Cussì i missionaris furlans si son palesâts oms plui di pratiche che di teorie, plui di servizi che di comant, savint che, tal ream di Diu, dut al è nobil, ancje netâ il cûl di un frut o medeâ une plae infetade.
Mi plasarès che, dongje de concretece e dal servizi, si puartassin come viatic la nestre teologjie aquileiese, cul rispiet pal pluralisim e cu la veretât consolant de salvece universâl rafigurade tal mosaic di Gjone e dai pes. Insieme cul dogme de incjarnazion tal sens di sprofondament fintremai tal font de miserie spirtuâl de umanitât.
A son partîts di chi tun timp di grande puaretât economiche ma di ricjece spirtuâl. Dome un popul siôr di fede e di valôrs al rive a espuartâ vocazions. Cumò no vin plui fan matereâl ma salacor o vin miserie spirtuâl. Di fat o espuartìn capitâi ma no vocazions.
Ur domandìn alore ai nestris emigrants pe fede di no dismenteâ la lôr tiere e la lôr glesie. E di capînus tai timps grivis che o stin vivint. Salacor al è plui gratificant jentrâ tune staipe africane plene di fruts che ti tirin di ogni bande che cjatâti tune glesie ricje di art e di bêçs e cence un cjan. ■
(Publicade su la Vite Catoliche ai 24.01.1998 Cirint lis olmis di Diu vol. 4, pagj 133)
pre Antoni Benline

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +