Sfuei Mensîl Furlan Indipendent
Archivi de Patrie

IL FERÂL. De famee al seminari

............


Pre Antoni di frut si inamore dal Domo, des funzions, de liturgjie, dal cjant di glesie. Chest i puarte emozions e sensazions e al sint la gole di jentrâ in seminari. E nas la sô vocazion. Cun dut che il seminari par lui al jere un ambient masse strent, al à resistût fin dapît e par furtune!

Pre Roman

De famee al seminari

La vocazion, la clamade di Diu, o no sai ce, e à cjapât chest frut sempliç, content, amant dal vivi, curiôs, sentimentâl, romantic, chest luiar che si contentave di une spere di lûs, di une semençute minude minude, di une gote di aghe o ancje di rosade, che al tacave lis sôs zornadis cul cjant e lis finive cul incjant de sere, e lu à sierât dentri tun lûc masse grant, masse serio, masse frêt, masse disuman, masse muart par che al podès conservâ la sô virgjinitât, solaritât, positivitât, istintivitât, vitalitât. Mi àn condizionât in dut e par dut, a partî des robis plui personâls e intimis e bielis, come la scuvierte dal propi cuarp, la scuvierte de amicizie fra fruts e miôr ancjemò fra fruts e frutis, i prins pas viers il bosc incjantât e inmagât là che ognidun di nô, sore dut i puars, si fasin il lôr nît fantasiôs e segret par lâ a parâsi e a rinfuartîsi e a vuarî dai colps trements e des amarecis devastantis de vite.

Le àn metude dute par fâmi deventâ mugnestri, par fâmi stâ in rie, par fâmi resonâ e fevelâ come lôr, par fâmi un prodot sigûr a prove di bombe, un che al acete dut, che al glot dut, che no si fâs e nol fâs mai une domande, un che al dà la vite par un sisteme che i gjave la vite. Dome Diu al sa trop che o ài tribulât, trop che o ài vaiût di scuindon, trop che o ài sacramentât cuant che o jeri di bessôl. Mi àn segnât, mi àn timbrât, mi àn condizionât, ma no àn rivât dal dut e chest al è un miracul no di pôc. Rivâ a saltâ fûr cuntun fregul di umanitât di une fabriche che e veve par finalitât supreme e estreme di gjavâti ancje l’ombre dal “om vecjo”, e je stade une scomesse, une sfide, une gracie che no rivi a spiegâme. Sore dut tal gno câs, di frut timit, spaurît, che al veve e al à ancjemò pôre de pôre. Diu al è stât de mê bande e nol à lassât che il so scriçut al finìs tes sgrifis dal falcuç.

Jessût di une famee puare e cence nissune parvence di nobiltât, ultin dai ultins, cul deventâ predi mi soi cjatât a colp plui in alt di ce che si ves podût inmagjinâ. Un salt di cualitât. Di fat, cuant che o soi tornât dongje cu la consacrazion e la int di Vençon mi à fate fieste come a un nuviç o come a un agnul, al è vignût a bussâmi lis mans un dai maiorents dal paîs, che di frut mi veve fat avonde vaî scrivint sul libri de spese: «Non oltre diecimila». E mi diseve presince di ducj: «Dîsii a tô mari che, se no puarte bêçs, no pues dâus di mangjâ!». Cuant che si sin cjatâts muse a muse, no mi soi sintût di tasê e i ài dit: «Lis mans che lui al busse a son simpri chês che a levin vie de buteghe strengint il libri de spese e sustant pe vergogne».

Ancje vuê, cjatantmi a predicjâ tal gno domo di Vençon, maiestôs come une catedrâl, e o cjali jù dal pulpit la int che mi sta scoltant, o riviôt tun lamp dute la mê vite e o dîs: «Cjale tu, là che il Signôr mi à menât! A fâmi scoltâ dai grancj, jo che o jeri considerât une scovace! Se al fos puar gno pari a viodi!». No lu dîs par supierbie o par svindic, ma cun chê serene contentece de Madone cuant che e cjante: «Al à butâts jù i potents des lôr sentis e al à puartât in alt i umii» (Lc 1,52). Baste che i umii, une volte in alt, no deventin ancje lôr potents o prepotents. Al esist il siôr che si dismentee dal puar, ma al esist ancje il puar deventât siôr che al dismentee la situazion di prime.

✒ pre Toni Beline

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +