IL FERÂL. “Cjâr” pape, tu nus costis masse!

Il cantin al scugnive saltâ fûr, parcè che lis unichis regjons che il pape nol à stàt a son la nestre e il Trentin-Sud Tirol.
Ocasions a ‘nd jere: in Friûl il milenari di Udin; a Triest i 25 agns de consacrazion a la Madone. Cumò, tant par cjatâ fûr un rimpin, si pensarès al licôf pal domo di Glemone, tal decim dal taramot Ma la robe e je frede e ni là jù ni culì nissun no si decît a fâ il prin pas. Tune cunvigne di chest mês, al è stât frontât il “câs” e lis resons di cheste mancjade visite a saressin chestis.
A Rome, che a son informâts su la situazion gleseastiche e politiche nostrane, a àn pôre che il pape al vegni contestât tant di une bande e di chê altre.
Al è clâr che la “Glesie furlane” no tasarès su la improibizion di preâ par furlan, robe garantide dal dirit naturâl oltri che dal dirit dai popui. E chest un pape al à di capîlu, co al va berlant di spalancâ lis puartis. Ancje lis sôs! Lu tacaressin i slovens, pe stesse reson. E par resons juste contrariis, i martars de talianitât, che tai confins a ‘nd è simpri bondance. E alore il pape, che al è galiot, al preferìs navigâ in altris aiars, cence lâ a urtiâsi a pote vie.
Te glesie “regjonâl” nol è che la clime e sedi miôr. Un vescul no i va chest mût di fâ che al sa di trionfalistic e di baracon; un altri al à pôre di jessi ferît tai siei sintiments di altissime talianitât e che i slovens a alcin masse la creste.
Cualchidun, plui concret, al à fevelât ancje di trop che al costarès chest fat “storic” e a son saltâts fûr ancje i numars. Stant ai esperts, si vignarès a spindi, pal viaç, 3 miliarts (3000 milions!). In plui e je usance di dâi, dongje dai garofui e dai pipins, une “buste” pes sôs oparis di ben. I plui pedoglôs a dan sui 300 milions; chi di nô, par no fâsi cjalâ, si varès di dâi 500 milions. La regjon, daûr che si sint, e sarès ancje disponude a smolâsi pal viaç ma al reste simpri il mieç miliart des diocesis ospitants. Cence meti in cont ducj i berdeis di pulizais, di garbenîrs, di controi cjase par cjase, di stradis blocadis e vie. Insome, cun tantis disgraciis che o vin vudis, no podìn permetisi altris conseguensis. E di fat la rispueste cuasit gjenerâl e je stade che, salacor, al è miei che al resti là che al è. Se al crôt, che al prei instès par nô, che nô i cuintrigambiarìn, magari in marilenghe, ancje se no val. O pierdarìn di une bande, ma o vuadagnarìn tal tacuin, tai gnerfs e, siguramentri, ancje in fat di religjon. Cul timp a lâ, al vignarà ben un pape plui a bon presit!
PRE ANTONI BELINE