AA.VV. Incuintris, Incontri, Palme 2002

“La passion pe lenghe, pe culture e pes tradizions furlanis e la braùre pes sôs lidrîs a tegnin dongje, daspò incà, la clape de Scuelute Furlane di Palme che, tai doi ultins agns, e à inmaneât conferencis su argoments rivuardants il patrimoni storic, culturâl e lenghistic dal Friûl”
◆ Cheste presentazion e dîs za dut ce che al è di savê su chest libri. La scuelute di Palme e à vude vite fin che i volontaris che le vevin fate sù a àn podût tignî dûr. Al è il biel ma ancje il limit dal volontariât: cuant che un al mole no si pues disi ‘parcè molistu?’, ma dome ringraciâlu par chel che al à fat.
◆ E cussì, cumò che la scuelute no je plui, al è biel tornâ a cjapâ in man cheste publicazion bilengâl (furlan e talian) che e pant lis relazions des vot conferencis tignudis a cjaval dai agns 2001 e 2002.
◆ Pier Carli Begotti al fevele des origjins e dal svilup de lenghe furlane, metint in lûs la sô evoluzion partint dal latin rustic e des influencis gjermanichis e slavis.
◆ Franco Finco al ponte la sô atenzion sul furlan de Basse, diferent di chel centrâl, ma ancje plen di particolaritâts intal so interni. Lis isoglossis nus judin a orientâsi in chestis varietâts che cualchi volte a tocjin fintremai dôs frazions di un stes comun.
Plui che un conference e je une serade di poesie, chê dal grup Majakovskij, i poetis di là da la aghe che a lavorin sui struments de poesie tant che un scultôr sul marmul.
Ae figure di Turoldo, predi, inteletuâl e poete, a son dedicâts doi tescj: Nicola Borgo al fevele dal om e dal so impegn civîl e culturâl. Sabrina Baracetti e fâs la storie dal film Gli Ultimi, zirât intai agns 1961-1962 dal regjist Vito Pandolfi, une sorte di trasposizion di une conte autobiografiche di Turoldo.
◆ Ovidio Colussi al fâs une meticolose storie de Academita di lenga furlana metude adun di Pier Pauli Pasolini intai agns che al jere scjampât a Cjasarse, il paîs di sô mari.
◆ Luzian Verone al fâs un ritrat a plen rilêf di pre Josef Marchet, pont di riferiment no dome pe lenghe furlane, ma ancje pe culture, pe storie, pe art, pe antropologjie.
◆ Al complete il libri un struc dal intervent di Francesc Sguazzin che al à fevelât de flore intes risultivis de Basse furlane, une ricjece che fin cumò e je rivade adore a salvâsi des modificazions puartadis dal om, ma che e je simpri in pericul. ❚