Zuiâ di scacs si pues… ancje par furlan. La biele gnove e ven di une iniziative che la scuele di scacs “Vera Menchik” de Asd Scacchistica Pordenonese che e à realizât un gnûf libri su lis regulis dai scacs in lenghe furlane. In cheste maniere, pe prime volte si dopre la lenghe furlane par insegnâ cemût frontâ un dai plui antîcs zûcs che i oms a àn inventât par meti ae prove la lôr inteligjence.
◆ La publicazion e à vude la consulence linguistiche de Arlef e si clame “SCACS. Dutis lis regulis dal zûc (e alc di plui)”. Si trate di un strument gnûf par spiegâ il movisi armoniôs e aventurôs dai tocs su la scachiere. Un movisi che in dut il mont e in dutis lis lenghis al cjape dentri int di ogni etât e di ogni condizion sociâl. A puedin zuiâ ducj: fruts, fantats, adults e anzians, cun vantaçs cognitîfs e comportamentâi no indiferents. A chest pont, tra chescj vantaçs, al è ancje chel di podê nomenâ i tocs e i moviments ancje par furlan. E intes scuelis che a fasin furlan chest libri al po jessi une maniere une vore interessante par insegnâ in marilenghe ai nestris fantats. ❚
I scacs a fevelin par furlan
Redazion