I prins 30 agns de fondazion che e puarte svilup e jutori aes nestris comunitâts

In Dicembar, la Fondazione Friuli e à ricuardât i siei 30 agns di ativitât. L’inovâl si è davuelt a palaç Antonini-Maseri, sede de Universitât dal Friûl, ai 6 Dicembar, cu la presince dal president de Fondazione Giuseppe Morandini, cul president de Regjon Massimiliano Fedriga, i sindics di Udin e Pordenon Pietro Fontanini e Alessandro Ciriani, il retôr de Universitât Roberto Pinton, moderâts dal diretôr dal Messaggero Veneto e dal Piccolo Omar Monestier. La Fondazione è je nassude ai 6 di Dicembar dal 1991 in aplicazion de leç Amato di privatizazion dal setôr bancjari. Prime si clamave Fondazione Cassa di Risparmio Udine e Pordenone, che tal 2016 e je deventade Fondazione Friuli. In chescj 30 agns, l’ent al à sostignût 13 mil e 503 intervents sociâi, culturâi e formatîfs, dant fûr 177 milions e 818 mil euros. Il patrimoni invistît al è passât di 136 milions ai 359 milions di vuê.
◆ «O volìn afidâ la celebrazion dal aniversari – al à dit il president Morandini – a azion concretis, utilis e stabilis come chês che o stin puartant indenant tai centris storics di Udin e Pordenon. O ringraciìn ducj i aministradôrs che in chescj 30 agns a àn puartât indenant il compit che la Fondazion e à tal sostignî il svilup des comunitâts dal nestri teritori». La Fondazione Friuli e je cumò impegnade tai progjets di ricualificazion dai centris di Pordenon e di Udin. A Pordenon si puarte indenant i intervents di sistemazion des façadis dai palaçs dal centri, e invezit a Udin si met a puest la ex sede de Bancje di Italie: «Dopo 400 agns – e à spiegât la project manager Paola Veronese – l’edifici al sarà tornât a vierzi ae citadinance e ae fruizion publiche: chest percors al risulte strategjic sedi pe citât che par rigjenerâ il borc storic di vie Glemone». Il recupar al previôt un invistiment di 6 milions di euros e al finissarà tal 2023; al interessarà i 3500 metris cuadrâts de struture distribuide su 4 nivei, dulà che a saran rigjavâts spazis espositîfs par cunvignis, l’archivi (500 oparis di art e tancj libris antîcs), locâi a disposizion dal Ateneu furlan e i uficis de Fondazione. Cun di plui, si fasarà un passaç pedonâl jenfri place Prin di Mai e borc Glemone, fûr pai zardins di palaç Antonini-Masieri. «La Fondazion – al à dit il retôr de Universitât Roberto Pinton – in chescj agns e à svilupât une sinergjie cul Ateneu che e à permetût di rispuindi aes esigjencis che a tocjin il mont dai zovins intant e dopo dai studis universitaris, e tal stes timp di incressi la coesion cul teritori».
◆ «L’apuart de Fondazion – al à dit il sindic Alessandro Ciriani – pe cressite sociâl di Pordenon si è indreçât a dutis lis fassis de popolazion, contribuint in maniere determinante ae realizazion di obietîfs ambiziôs tant che il slargjament de ufierte formative dal Consorzi Universitari di Pordenon cun invistiments tal percors di formazion dai nestris fantats». «Tant che aministrazion comunâl – al à dit il sindic Pietro Fontanini – o stin invistint gruessis risorsis pe ricualificazion urbane, par rindi Udin une citât vivibile e sigure pai citadins e apetibile sul front turistic. La colaborazion strente cu la Fondazione, e permet di realizâ lavôrs spietâts de comunitât e di trasferî de potence al at la nestre vision de citât tal prossim futûr».
◆ «I progjets de Fondazione – al à dit il president de Regjon Fedriga – condividûts cu la aministrazion regjonâl e indreçâts sedi aes scuelis publichis che a chês paritariis, si concretizin cun azions impuartantis e complementârs ai intervents proponûts de Regjon. Cu la stesse capacitât di cjalâ lontan, l’ent al sta slargjant il so cjamp di intervent par donâ a ducj i citadins gnûf spazis ricualificâts. E je une sfide che e merete la poie e che la Regjon e sostignarà cun convinzion in futûr». ❚