E je rivade la Istât, e pai furlans al vûl dî dome une robe: Lignan. Dutis lis sabidis e lis domeniis il furlan al cjape la machine e al partìs, cun doi grancj pinsîrs tal cjâf. Il prin: saraie la polizie sul stradon di Tisane? Varaio pardabon di lâ a cincuante intune strade di dôs corsiis par bande?Il secont: va ben, ma in ce Lignan aio di lâ? Sì, parcè che secont di ce che tu âs di fâ, tu âs une Lignan di scelzi. Sabbiadoro e je la sielte plui tradizionâl, chê che no scontente nissun. Sabbiadoro al è il puest da lis fameis, dai fantats fin a disevot agns e dai todescs. Li tu cjatis un lît lunc e larc, lis buteghis par cuant che al è nulât e i PR che la sere a distribuissin lis riduzions par fodrâ l’asfalt.
Dai disevot agns fin che no si fasin fruts (che dopo si devente une famee e si torne a lâ a Sabbiadoro) si va a Pinete. Pinete al è il puest dai zovins e dai todescs. Il lît al è plui piçul e dut di rive in jù, ma cuant che tu jessis tu cjatis almancul cuatri-cinc puescj par cjoli un aperitîf. E la sere, se no tu sês ancjemò intor a chel aperitîf, a son locâi, discotechis, dut ce che tu âs voie, cussì la matine tu sês cussì strac che no tu ti rindis cont che il lît al è di rive in jù.
In ultim, a son chei che a scelzin Riviere. Riviere al è il puest dai plens di bêçs e dai todescs. Cualchidun al dîs che par jentrâ a Riviere bisugne passâ un bloc da la finance e fâ viodi il 740. Il probleme al è che a Riviere no si cjate nuie altri che plens di bêçs, cussì ancje cui che al à la cjase li, di sere al va a Pinete par fâ viodi il machinon a cualchidun altri.
E sarès ancje Lignano City, une robe che e varès di stâ tal mieç tra Sabbiadoro e Pinete, nome che nissun al è mai rivât a capî dulà che e sta. Par chest no à une sô identitât. In some: City al è il puest dai todescs e vonde. Ducj le àn sintude a nominâ, ma vêso mai sintût cualchidun che al dîs “O voi a City”? Pluitost, un al va a Barcole a distirâsi tal ciment cui triestins.
Ma e rive un etât, ta la vite di un furlan, che ancje se nol à fîs e al cjape milions di euros al mês, al torne simpri a Sabbiadoro. Sì, parcè che al è chel il puest dai furlans vêrs, chei che ancje la domenie e il mês di Avost a àn nome une robe tal cjâf. No par nuie al è l’unic puest al mont dulà che i implans balneârs si clamin “uficis”.
Bete di Spere