5. I Longobarts e la glesie di Aquilee

I altârs dal patriarcjât di Aquilee
L’altâr di Ratchis al è fat daûr de proporzion insegnade di Platon tal Timeu. Lis misuris lis à rigjavadis A. Tagliaferri. La lastre di front e à une altece di m. 0,898 che e je la sezion di aur de base: b. m 1,453: 1,618 = 0,898. “Ma ogni gjenar di cuarp al à ancje une profonditât e la profonditât al è necessari che e cjapi dentri la nature de estension” (Tim 52C), si che duncje “i cuarps solits no son mai tacâts di un sôl di mieç, ma simpri di doi di mieç” (Tm 32B). La profonditât de bande çampe e je di m 0,875 e chê di drete di m 0,860. Ancje cirint di gjavâju chei di mieç no vegnin fûr, segn che l’altâr al è nassût cuntune taule e la lastre frontâl e di cheste a vignaran gjavades ancje lis misuris dal solit. Cjapìn lis misuris nome de sene dentri de curnîs: b. m 1,29, h. m 0,705 (fig. 10) e gjavìn la sezion di aur de gnove base BC: m 1,29 : 1,618 = 0,797 e la sezion di aur de sezion di aur: m 0,797 : 1,618 = 0,492. La fasse M’M: 0,797 – 0,492 = 0,305 e disegne precise la figure dal Crist “ta la plenece dai timps” (Ebr 9,26), “la anime dal mont”, la Misure (la man drete dal Pari-Un) Misurade (la Maestât di Crist “Verbum caro factum”).
Simpri restant dentri de curnîs, gjavìn la dople sezion di aur ancje de altece: h. m 0,705 : 1,618 =  0,435 e 0,435 : 1,618 = 0,265 e tirin lis paralelis orizontâls e verticâls. A risultin doi cuadrâts compagns te fasse che ten dentri il Crist, plui siet retangui diviers, ma chel al centri al ten la man “obtorta-strupiande” di Crist. Su chest triangul, paralêl a chel origjinâl, si pues ripeti lis stessis operazions di prin, cui stes risultâts di cuadrâts e retangui “sine fine”, come che al compuarte il metodi gnomic, fondât su la someance. Al è il rapuart dinamic dal Crist incjarnât e risurît, dal “cumò ma no inmò” e dal Diu che no si pues concepî cul nestri pensîr (fig. 1).
“Stant che il mont nol cjapave dentri ancjemò ducj i vîfs che a vevin di nassi, par chest che al macjave al risultave disomeant dal model” (Tim 53D). “Al finìs tal me cuarp chel che al mancje al sacrifici di Crist pal so cuarp che e je la glesie” (Col 1,24). Il “jessi” de-limitât al reclame al “no jessi”, intindût in maniere platoniche come diferent o diviers: -jo no soi chel che tu sês tu-. Par Platon nol esist il nuie, ma il diviers o pluralitât.
“La superficie plane e drete e je fate di triangui e ducj i triangui a derivin di doi triangui che a àn ognun un angul ret e doi a acûts. Di chescj triangui, cualchidun al à di dôs bandis une part compagne di angul ret delimitât di doi lâts compagns (isossele); cualchi altri invezit al à parts scompagnadis dividudis di doi lâts discompagns (scalen)” (Tim 53D). Po ben lis diagonâls de lastre frontâl a formin i doi triangui indicâts di Platon: l’isossele e il scalen (fig. 2). Un cuintri chel altri in orizontâl a son sîs triangui retagui (cul cuadrât dal lât maiôr trê voltis dal cuadrât dal lât minôr e il catêt minôr compaign a mieze ipotenuse), che a fasin doi triangui dai lâts compagns e ancjemò un cuintri chel altri in verticâl altris doi triangui scalens retangui che a fasin doi triangui isosselis. Cun chescj doi triangui Platon al rigjave la bracidure dal mont: il tetraedri (il fûc), l’otaedri (l’aiar), l’icosaedri (la aghe), il cubi (la tiere) e il dodecaedri (l’etar). Chestis a son stadis lis misuris dai altârs tal patriarcjât di Aquilee fintremai al concili di Trent. I acuileiês a leievin il vanzeli cun mentalitât platoniche cussì come che al jere scrit la plui part dal Gnûf Testament. Cheste mode non jere ideologjiche e no faseve violence al test de Scriture. No sarès mai deventade une culture esclusive e tant mancul discrezionâl. Il so impat etic al jere la misure, la armonie, l’ecuilibri, cence esagjerâ ni cul masse ni cul masse pôc; propit di chescj estrems la proporzion e rigjavave la juste misure o di aur: “in medio stat virtus”. No si tratave di compromès o relativisim, ma di sapience, confront di condotis une miôr di chê altre. La virtût “eroiche”, magari fint al martiri, no jere di cjase in Aquilee; chel gust sadomasochist di torturâsi nol jere preseât. No levin a convertî i “salvadis” ni i “barbars” che a savevin che e jere int clamade di Crist come ducj.  “Ame chei altris come te stes” al voleve dî che se no si à une juste stime di se, no si stime nancje chei altris e prin o dopo, simpri cuant che si à il podê, si ur darà une man magari fasintju patî “pal lôr ben” come che al capite al incuisidôr di turni. Il cristian acuileiês invezit, “cuant che e rive la sô ore”, al savarà frontâ ancje la muart come Crist, ma cence bisugne di sfidâle ni di lâ a cirîle. Duncje soredut vivi come Diu al comande: “No cui che al dîs Signôr Signôr al jentrarâ tal ream dal cîl, ma chel che al fâs la volontât di gno Pari” (Mt 7,21); “ex fructibus” (Mt 7,21); “mostrimi, se tu sês bon, la tô fede cence oparis che jo ti mostri la mê cu lis oparis” (Gc 2-18).