I furlans a son come la nêf

Cuant che o pensìn a ce che i nestris sorestants si augurin pal Friûl intal an che al vignarà, trope fiducie vino di vê? Cjalant ce che al è vignût indevant in chescj ultins agns, pensaiso che cui che al vuide cheste regjon le voledi plui libare e autonome? La sostance dai resonaments che la economie e la politiche a stan sburtant cun fuarce nus puarte intune direzion pardabon contrarie: dut al fâs capî che là che si comande si è daûr a lavorâ par fâ cressi une grande Vignesie che si tapone par cumò sot de ombrene dal tiermin “Nordest”, ma che in curt e saltarà fûr come la soluzion a ducj i problemis di un Friûl simpri plui piçul, puar e sturnît, sierât intun glimuç di contradizions.
◆ Il Leon de Serenissime al è pront par tornâ a glotinus, lassant a Triest il rûl di seconde Vignesie (Julie) di risierve. Za cumò la informazion e à mudade piel e sui cuotidians regjonâi, chei che une volte si cjoleve par lei des barufis dai nestris paîs, cumò si fevele di Conean e Padue plui che di Cerneglons e Listize. Il dissen al è clâr: il Friûl al à di sparî, lis sôs peculiaritâts e lis sôs comunitâts a àn di jessi scanceladis o assimiladis, jentrant tant che parts de macroregjon Trivenite che si sta metint dongje di fat ancjemò prin che di dirit.
◆ E alore, cun chest pericul in vore, ce fasarano i furlans? Nissun lu sa, ma po stâi che a fasaran come che a àn fat cun chês altris ocupazions e invasions che a son vignudis a “liberâju”. La int furlane e à superadis dutis lis provis che la Storie i à metût denant. O vin imparât che lis provis no van frontadis di pet come kamikaze ma covente dâ il pês just aes azions di chei che a àn il podê. A puedin comprâ la tô tiere, obleâti a stâ sot paron cu la leç, tignî un popul sot scac: ma se i furlans a àn ancjemò une anime, chê nissun nol è in stât di pleâle.
◆ I furlans a son come la nêf. E ven jù cuiete, ma nissun le calcole, tant prin o dopo si disfarà. Ducj le stimin biele ma inocue, cul so fâsi e disfâsi che al è dut un lavorâ. Ma al ven il moment che la nêf, cuant che si da dongje e e mostre dute la sô fuarce, e je buine di crevâ boscs intîrs e fâ colâ cuvierts. Chel moment nol è ancjemò rivât, e salacor nol sarà nancje tal 2025: ma al vignarà un dì, come che al diseve Pasolini, che o tornarìn “a inacuarzisi di vê une storie, un passât, une tradizion”, che a menin dutis viers de autonomie, di pinsîr e di guvier. E je inte nestre storie, no pues mancjâ intal nestri avignî. ❚