I CLASSICS – 16. SANT JACUM, LÀ CHE AL FINÌS IL MONT

Fortune e disgracie de nestre ete
Metint pît a Santiago, dopo a pene une ore di svol, o ai pensât ae fortune e ae disgracie de nestre ete. Di rivâ intun lamp fint ai confins dal mont, ma di no vê il timp materiâl e psicologjic di preparâsi. E o ai capît ancjemò une volte ce che e à provât mê none Ane lant a Licau e a Madone di Mont. E diseve che la Madone di Mont e je une lobie a prefarence de Madone di Licau. E pûr, cjalant ben, al è vêr il contrari. Di fat la Madone di Licau e je minude minude, une cagnere di Madone. Mi domandavi: «Cemût mai che mê none, une femine cussì esperte, si è sbaliade?». No si jere sbaliade. «Al è che e veve stât a pît, / come che a levin ducj / in chê volte. / E cuant che si va a pît, / si è sfinîts, / stracs madûrs di vueli sant, / che no si rive mai, / ma cuant che si rive / magari tune cjasute / al somee di rivâ / intun palaç. / E un sbit di gleseute / al devente un domo. / Al è il desideri, / la brame, / il spasim, / l’impit di rivâ / che us fâs viodi lis robis / grandis e bielis» (Ae Madone di Licau).
A nô nus mancje chest timp di preparazion, il spazi e il distac tra la cuotidianitât e il moment straordenari de esperience religjose prime di tornâ tal cuotidian. Mi contavin i miei amîs predis che, tal lunis prin di montâ in coriere, a vevin fat messe, scuele, a vevin stât in bancje, a vevin distrigât dafâs e berdeis. In pratiche si à rivât a fâ il pelegrinaç cence saltâ une domenie, cuant che si sa che i pelegrins medievâi a stevin vie mês e agns e plui di une volte e di dôs a murivin par strade. Che di fat prin di partî a jerin obleâts a fâ test e a consegnâlu al plevan. Di chi si pues capî ancje la intensitât di une esperience preparade di dute une vite e contade par dut il rest de vite e tramandade ai fîs e ai nevôts che a vevin di zontâ ognidun il so particolâr fantastic e meraculôs. Si à ancje di meti in cont un altri aspiet no margjinâl. A Sant Jacum a levin pôcs e chei pôcs a levin dome li. Si tratave dungje di une esperience uniche. Cumò si va a Sant Jacum, a Sant Pieri, a Lourdes, a Fatime, a Viene, a Budapest, al mâr e vie. No dome o vin la cuistion de pocje preparazion ma chel plui grant de saturazion. Come cuant che si ingolfisi, che no si vûl nancje sintî a vê indiment di spese. Jo mi visi il prin viaç a Madone di Mont, dal ’48, cuntun camion militâr, e no mi visi di viaçs plui stimolants fats dopo. Come che mi visi des primis scarpis, di cuant che o soi lât in ‘seminari pe prime volte platât sot di un telo parcè che o scugnivi puartâmi ancje la robe, de prime sere te canoniche di Rualp che mi someave un palaç ancje se e jere puare a preference di chel palaçon che o vevi lassât a Codroip. Come che une mari si vise de prime volte che e à cjapât in man la sô creature e un inamorât di vise di ducj i particolârs e al sint ancjemò il sgrisul de prime strente e de prime bussade. O ai viodût plui jo inte mê vite, siben che no soi un torzeon, che no ducj i plevans di Visepente prime di me. E pûr chel pôc che a àn viodût lôr ur à segnade la anime par dute la vite, cu la cuâl che jo o riscji di fâ confusion tra un fat e chel altri. Se o ves di domandâ une gracie a Sant  Jacum, santul dai pelegrins, o domandarès la preparazion e la moderazion. Parcè che no si pues  gjoldi cence desideri e no si pues desiderâ cuant che si è passûts. O cognòs amîs che a àn zirât dut il mont, cul risultât di une grande confusion e di une sglonfe no mancul grande. Naturalmentri il discors dal desideri e de moderazion al vâl ancje par altris robis, sigurementri plui vitâls di un pelegrinaç. I pelegrins che a rivavin a pît dopo traviersiis e pericui di ogni sorte, a pene che a viodevin di lontan lis spicis di Sant Jacum si butavin in zenoglon cjantant il “Te deum”, se la comozion e la strachetât ur permeteve di cjantâ, e po a corevin cu lis ultimis fuarcis restadis viers de glesie, pal puarti de Glorie, a meti la man su la colone de vite e a domandâ lis trê graciis che dopo Sant Jacum al vares sielzude la plui impuartante e juste. Invezit nô, mancul stracs, o vin spesseât a domandâ la clâf de cjamare par risfrescjâsi e polsâ un credo. A conferme di ce che o ai dit modant. In plui, il pelegrin che par prin al viodeve lis spicis dal santuari al vignive incoronât re dal pelegrinaç.
pre Antoni Beline