I CLASSICS. 13 – CUINTRISTORIE DAL FRIÛL La albe de nestre Patrie

Dal 1848 al 1866
Des trê «epopeis» talianis dal secul passât il Friûl al cjapà part ative nome ae prime: a chê dal 1848. In chês altris dôs nol podè fâ altri che stâ a cjalâ filis di soldâts che a passavin ca e là. Cualchi furlan scjampât di chest al fo a batisi a Sant Martin o in Sicilie cun Garibaldi (19 di numar) o in cualchi altri sît: e di chescj, se si va a scrusignâ tes cjartis des autoritâts de glesie, si cjate che a jerin robate, cence religjon, scostumâts, fanatics; se si crôt ae leterature patriotiche a jerin «purissimi martiri». Ognidun che al vebi un freghinin di çucje al capìs subit cemût che a vadin cjapadis chestis definizions e si fâs di bessôl une idee di ce int che e jere.
Sui fats dal Friûl in chescj disevot agns o vin un sôl libri che al merti let e pensât: i «Ricordi militari del Friuli» di E. D’Agostini, che – lassant in bande i siei judizis e lis sôs opinions – al riferìs un grum di particolârs e al met adun une biele vore di documents, di caratar militâr e politic, che a permetin di formâsi un concet, ancje diferent di chel dal autôr. Parcè che al va dit che il D’Agostini, talianon e militarist, se nol sparagne lis solitis tamburadis nazionalistichis, se al va a cirî ancje lui cul feralut chei bruts incidents che in nissune vuere e in nissune sdrume di soldâts no son mai mancjâts, te sostanzie al reste ancjemò onest; e tantis e tantis voltis al ricognòs la sapience, la pratiche militâr, il valôr e la coretece dai comandants da la Austrie, la dissipline, la fedeltât e il spirt militâr dai soldâts, e di chê altre bande la insipience, la imprevidence, la retoriche, la confusion, i sbalis e lis carognadis che si fasevin di chê altre bande.
Par capî un pôc la storie dal ‘48, si à di tignî a ments almancul chestis trê robis: la politiche sdrindulade dai prins timps di puar Pio IX, che e veve disconciertadis lis ideis dai predis e de plui part dai catolics ancje des nestris bandis; la rivoluzion di Viene che e lassave cence diretivis lis autoritâts militârs e civîls di chescj paîs; e il fat che in dut il Friûl, sot dal gjenerâl Auer, si cjatavin a jessi cuatri batalions di fantarie formâts, in part, di Furlans, di Lombarts e di Venits e une sezion di artiliarie cun sîs canons: chestis fuarcis a jerin dividudis tra Udin, Osôf e Palme. E nissune sperance o pussibilitât di vê rinfuarçs di nissune bande.
Cussì, co lis solevazions a scomençarin, prin te basse Italie e po a Vignesie e in Lombardie, il gjenerâl Radetzky (1) al spesseà a concentrâ lis sôs fuarcis, tes cuatri fuartecis dal «Quadrilatero» e, a Udin, il gjenerâl Auer, al consegnà, cence nissune resistence, la citât e lis dôs fuartecis furlanis al Comitât provisori; al lassà in libertât chei soldâts (2) che no volevin restâ sot la Austrie e si tirà cun chei altris a Gurize. Chest risultât cussì facil e slis al incjocà i patriots e, par un mês, invezit di pensâ che no podeve jessi finide e che il biel al veve di vignî, si bandonarin a une mate baldorie, cence armis, cence mieçs, cence ordin, cence ombre di preparazion militâr: soldât de vuardie civiche, volontaris, carognis vignudis di Vignesie, predis e feminis si scolarin di flât a cjantâ e a cjacaronâ. Ma un mês al bastà al Nugent, gnûf comandant de Armade di Risierve, par meti adun sul Lusinç uns 12 mil soldâts in gjambe: e dopo, in cuindis dîs (dai 16 di Avrîl al Prin di Mai) al jere bielzà di là dal Tiliment: culì a restavin di cjapâ dome lis dôs fuartecis di Osôf e di Palme. Udin, dopo cercjât un fregul di bombardament, al veve capît che la vuere no je un zughet e al veve molât, tra lis plui furiosis e stupidis maludizions di dute la Italie. Palme e tignì dûr doi mês, Osôf fint al mês di Otubar (dibot cinc mês).
Tant il Nugent a Udin, che il van de Nüll a Osôf si compuartarin cun moderazion, a faserin cundizions onoradis e a lassarin che i soldâts rindûts a lessin pai lôr fats: robis che in dì di vuê a fasaressin ridi, nome a pensâlis. Vignesie in chê ocasion e pensà ai siei fats, cence mandâ nissun jutori ai Furlans, e dopo ur strucjâ daprûf un grum di insolencis.
Ad implen la balfuerie e passà cence grandis conseguencis pal Friûl, de bande dal guvier de Austrie: nome che i Furlans, scotâts, a tignirin a ments la lezion. E cussì, dîs agns dopo, in chê volte de seconde vuere a sterin a cjalâ sul puarton di cjase i todescs che a levin viers Solferin, e dal 1866 a spietarin cun pazience e cun rassegnazion che todescs e talians a finissin di lâ indaûr e indenant. Une prove di organizâ partesans su lis monts, fate dal 1864-65 par ordin di Mazzini e finì in nuie pal scjars numar di chei che a rispuinderin e pe mancjance di coordenazion (3).
Tirant lis sumis, la int che e lassà in Friûl la plui brute memorie a forin i «crociati» di Vignesie rivâts a Palme ai 10 di Avrîl dal 1848, cul Grondoni (e cun dutis lis benedizions dal Patriarcje: «la feccia della società in fatto di scostumatezza e di prepotenza» al scriveve il president dal Comitât di Udin al comandant Zucchi di Palme); il maiôr Josef Tommaselli che al comandave il bloc di Osôf, cussì trist che nancje i soldâts todescs no volevin plui ubidî ai siei ordins; e i Triestin e Istrians vignûts a presidiâ Udin ai 22 di Jugn dal 1866, al puest dal reziment dal Granduche di Baden che al leve in linie.
Il mês di Otubar dal 1866, la Austrie che e veve pierdude la vuere cu la Prussie a Königsgrätz (Sadowa) e scugnì cedi il Friûl a la Italie, che e jere stade in leghe cu la Prussie. E ai 14 di Novembar al rivà a Udin il re Vitorio Emanuêl II (4).
Il gnûf guvier al lassà cjarte blancje a ducj i elements de massonarie nazionalistiche che e trionfave a Florence e, dopo, a Rome; al spesseà a meti in vigôr dutis lis leçs, massime chês cuintri predis e glesiis, e dutis lis tassis che a pesavin su chês altris regjons; al implantà l’ordenament burocratic acentrât e confusionari che al veve ereditât di Napoleon; al mandà dentri par amalgamâ i Furlans, une sdrume di funzionaris, impleâts, cuesturins e carabinîrs de Basse Italie; al scjadenà tes scuelis e tes placis la plui disperade propagande cuintri da la Austrie, che e comandave ancjemò di là dal Judri. E i Furlans, scjafoiâts di retoriche e di miserie, a scomençarin, a miârs e miârs, a fâ il baûl e lâ pal mont.
Il rest al parten a la memorie dai viei che a son ancjemò in chest mont e che a puedin contâlu di bessôi (5).
NOTIS:
(1) Johann Josef Franz Karl, cont di Radetz, nassût in Boemie tal 1766 e muart a Milan tal 1858.
(2) I militârs di cariere (e i professioniscj) a formin la gnove borghesie furlane.
(3) Si trate di fats sucedûts a Navarons, li che il miedi Andreuzzi al tentà, cuntun grup di amîs mazinians, un at rivoluzionari.
(4) Il gjenerâl Cialdini si puarte masse indevant a jevât e daspò al torne indaûr di corse par vie che no jerin clârs i confins efetîfs dal Venit. La gnove concuiste no ven cedude diretementri a la Italie, ma a traviers di Napoleon III.
(5) Pre Josef Marchet al scrîf cheste prime part de Cuintri Storie tai agns 50 dal secul XX.
pre Josef Marchet e pre Checo Placerean