I cîi e i boscs de Cjargne a rivochin di un Istât di musiche cu la prime edizion di “La Musica in Carnia”

“La Musica in Carnia: tra luoghi e storia” al è un festival che al à viodude la lûs pe prime volte chest Istât. Dai 7 di Avost ai 11 di Setembar, te alte Val de Bût a àn rivocât lis melodiis e i cjants che a àn promovût zovins cjantautôrs e grups furlans.
◆ Il Festival al è partît di Paluce, li de Siee da Fuce, cun i “Cinque uomini sulla cassa del morto”, grup atîf dal 2003, formât di Francesco Imbriaco, Alberto Corredig, Davide Raciti, Leonardo Duriavig e Alberto Marinig. I cinc a àn fat plui di 250 concierts insiemi, e cul talent e la energjie di simpri a son un dai grups plui preseâts de nestre regjon.
◆ La musiche si è daspò trasferide tal Ort di Siôr Matie a Sudri, cun Dario Snidaro, cjantautôr folk  country, che al conte in inglês di viaçs, storiis e emozions profondis. Cun lui ancje  Rebi Rivale: la cjantautore, che e à vinçût diviers premis nazionâi pe musiche di autôr, e jere acompagnade dal bassist e cuintribassist Filippo Tantino e de ghitariste Paola Selva. Il tercet, famôs a nivel talian, al à za trê albums al atîf, e il prossim al jessarà in curt.
◆ Sul finî di Avost, la serade ospitade te cjase di Baldissâr e Bastian te borgade Som la Vila, tal cûr di Ravasclêt, e je stade une misture di poesie e di profonditât, espressivitât e rafinatece, cul duet Massimo Silverio ae ghitare e Paolo Forte ae armoniche. Cun lôr, la serade si è inricjide de energjie psichedeliche dai B.B.F, ven a stâi Pietro Brunetti, Claudio Banelli e Carlo Forgiarini, amîs che a condivin une grande passion pe musiche dai agns ’60 e ’70.
◆ Daspò, a Trep Liussûl, cuintri ogni intemperie, Nicole Coceancig e Cristian Mauro a àn sunât un conciert plui intim, sul ritmi de ploie che e bateve sui cops de Pinacoteche De Cilllia. A  acompagnâ i doi cjantautôrs, un altri artist zovin e plen di passion in ogni sun che al compon: Alvise Nodale. La serade e je stade ancje insiorade de vôs di Marisa Scuntaro e dai suns de ghitare di Michele Pucci, cuntun viaç te memorie dai cjants, des melodiis arcaichis e de tradizion orâl.
◆ Sot dal cîl stelat di Çurçuvint, Emma Gustafson, cjantautore za cognossude pal so stîl folk de Italie ae Irlande, si è esibide cun Luca Zerilli, liutâr di Udin, ghitarist e bassist di diviers grups, dal hard rock al reggae. Te stesse serade, Alessio Velliscig – cu la sô vôs che e fâs vignî i sgrisui – al à presentât il so ultin lavôr di solist, jessût l’an passat: “Kama”.
◆ La prime edizion dal Festival si è sierade cuntun artist che nol à bisugne di presentazion: Gigi Maieron. Contis, poesiis, suns, vôs e melodiis intune fieste de musiche. No viodìn la ore che al vegni l’Istât cu ven par tornâ a scoltâ chescj artiscj di talent, e par imerzisi te nature come intune flabe, sot dal cîl de Cjargne.  ❚