Intal 2025 la Assemblee de Comunitât Linguistiche Furlane – ACLiF e finirà 10 agns. E je cressude dai prins 55 Comuns di lenghe furlane fin ai 149 aderents di vuê, sparniçâts fra Friûl-Vignesie Julie e Venit orientâl (sot de Citât metropolitane di Vignesie, ma part dal Friûl storic). La ACLiF e à l’obietîf di tutelâ e promovi la identitât culturâl e linguistiche furlane. Il president al è Daniele Sergon, sindic di Caprive.
◆”La nestre Assemblee – al evidenzie il president Sergon – e nas dal bas, a son i Comuns a decidi se aderî, ognidun par se. La mission scomençade 10 agns indaûr e je chê di judâ a fâ il Friûl simpri plui compat, cun dutis lis diferencis che a son fra un teritori e chel altri, che a esistin e a son la ricjece stesse de lenghe e de culture furlane”.
◆ Vie pal 2025 la ACLiF e larà indenant cu la ativitât leade ai zovins dai Conseis Comunâi dai Fruts, e cu la colaborazion cun chês altris realtâts istituzionâls che a lavorin pe tutele dal furlan, scomençant de ARLeF e de Societât Filologjiche Furlane. L’impegn al sarà ancje chel di vê plui marilenghe par radio e te television, massime intal servizi public (RAI). Dut cence dismenteâ il grant apontament di Go2025! Nova Gorica e Gurize Capitâl europeane de culture.
◆ “A Go2025! – Sergon i ten a dîlu – o poiarìn plui di une iniziative in program par rivâ a fâ cognossi che intun façolet di tiere cussì piçul si fevelin, vivint in pâs, cuatri lenghis”. E par finî al zonte: “Se no sarìn stâts bogns di dî chest, che al è un motîf vêr e ultin par definîsi speciâi e autonoms, o varìn pierdude une ocasion uniche”. ❚
Go2025, ocasion uniche ancje pal furlan
