Gnûf dispensari farmaceutic tal comun di Trep Liussûl

Infin une notizie biele e positive intal mont sanitari cjargnel: tal piçûl Comun di Trep Liussûl (che al conte cirche 600 animis) di dibot doi mês al è stât viert un nûf dispensari farmaceutic.
◆ La dotore Stefania Spiz, titulâr de farmacie “Romano” di Paulâr e dal dispensari di Trep Liussûl, e conte “La mê coleghe e à sierât la farmacie cirche 2 agns indaûr, duncje al è dificil capî cuale che e sarà la evoluzion di cheste gnove ativitât, ma in chescj doi mês o sin za contents de rispueste de int. Lis personis anzianis spes a vegnin ancje dome par passâ la peraule e par saludâ, cun di plui a puedin ancje sentâsi un moment tes cjadreis che o vin metût di pueste par chel. Pal moment e je une biele esperience. Sigûr che nol è facil, ma nus è vignût incuintri il Comun che si è ocupât di cjatâ un spazi par nô e nus à solevâts di tantis spesis. Pûr di vê chest servizi il Comun si è dât pardabon tant di fâ. O savìn benon che la disponibilitât economiche e je pocje e che une persone, cuant che e scuen decidi indulà vivi cu la sô famee, e cîr la soluzion economiche plui a so vantaç, lant a vivi plui dongje dal puest di lavôr.
◆ La aministrazion comunâl di Trep Liussûl e je lade cuintri corint: e à ricognossût che i servizis pai siei citadins a son pardabon necessaris e no je restade cu lis mans in man. Cheste sielte si scuen preseâle cetant. Si è metude a nestre complete disposizion, ancje se jo o jeri un pôc preocupade parcè che il spieli dai utents al è verementri piçul.”
◆ Ma parcè fermâsi intun comun de Cjargne di cirche 600 animis?
◆ “La sielte di vierzi un dispensari – e va indenant Stefania – e je stade detade di une leç regjonâl e di une statâl che e tocje chestis struturis. Il bant al è viert a dutis lis farmaciis, però si cîr di lâ a colaborâ cun chês dongje. A son cuasi 10 agns che o gjestìs chê di Paulâr (comun confinant cun Trep Liussûl) e o vin la fortune di jessi in 3 laureadis, plui mê sûr che no je laureade, e a nivel gjestionâl o rivìn a cuvierzi l’orari di servizi cence gjavâ nuie al servizi di Paulâr. Graciis ae disponibilitât des feminis che a lavorin cun me o sin rivadis a tignî simpri vierts sedi la farmacie che il dispensari e a garantî il servizi in ducj doi i comuns.”
Cumò a Trep Liussûl il dispensari al è viert lis buinoris di lunis, miercus e vinars e il miercus dopo misdì.
◆ La dotore Stefania Spiz e je ancje conseire de associazion di categorie dai farmaciscj e e dîs che “a son un grum di preocupazions tal nestri setôr. Si sin rindûts cont che soredut tal nestri teritori il fat che a mancjin cuasi dal dut miedis di base al sta butant in zenoglon ancje lis farmaciis, parcè che al ven a mancjâ il fat di lâ dal miedi e, di riflès, subit daûr in farmacie. A ‘nd è farmaciis che a àn pierdût tant parcè che cence miedis il lavôr al è calât di brut. O sin preocupâts: nol è facil sostignî coscj cuant che a mancjin lis prescrizions dai miedis.”
◆ Ma par fortune a esistin Comuns come chel di Trep Liussûl, che la dotore Stefania Spiz lu calcole “une perle rare”. “Cuant che o vin decidût di vierzi il dispensari a Trep Liussûl, nol jere il miedi di base. La aministrazion, ancje in chest câs, e je stade brave e e je rivade a recuperâ il miedi. Nô o sin pardabon contents di dâ chest servizi impuartant. No fasarìn grancj afârs ma l’impuartant al sarà rivâ a gjestî lis spesis. Si scuen pensâ al benstâ e ae salût des personis di chest teritori. In chescj comuns a son un grum organizâts: e je une becjarie, une buteghe di alimentârs, un ufici postâl, un ristorant e un albierc indulà che si cjatin ancje tabacs e gjornâi.”
Nol covente meti in lûs il fat che, cuant che la aministrazion comunâl i ten al so teritori e ae int dal so paîs, i risultâts si viodin. ❚