Gnove mostre dal mobil a Dimplan Giarle: une ativitât rivade ae cuinte gjenerazion

Tai timps che o stin vivint, puedial jessi considerade une matetât vierzi une mostre di mobii intun piçul paisut di mont come che al è Dimplan di Darte?
Nicola e Michela Giarle, doi fradis che a àn rilevât la ativitât dal pari Vigji Giarle, a fevelin di scomesse. “O sin un grum leâts a chest puest, e la scree de mostre e je stade une maniere par tornâ a valorizâ chest lûc indulà che nestri nono bis, Vissent da Plane, agns indaûr al veve la sô buteghe.”
Vissent da Plane al jere docent te Academie di Vignesie e al veve metût in pîts une des plui vecjis buteghis di marangon de Cjargne. Po dopo, la gjestion e je stade cjapade sù dal fi Vissent Cozzi e dal nevôt Jacum da Fede. E in chest contest, Vigji Giarle al robe il mistîr al nono e al barbe e al comence a fâ il garzonât par un pôcs di agns a Sudri, e dopo al vierç une buteghe in vie Marconi a Dimplan, indulà che vuê i fîs a puartin indenant la ativitât.
“Jo o ai fat il Malignani a Udin, mi sei laureât in inzegnarie gjestionâl te Universitât dal Friûl – al conte il zovin Nicola – e dopo o ai decidût di continuâ la ativitât impuartante di gno pari. Al è di simpri che o soi achì. O vin il capanon dongje cjase, e za di frut o jeri simpri li. E cussì, o ai decidût di continuâ. Al sarès stât un pecjât no fâlu: la struture e je; gno pari, ancje se al è in pension, mi da inmò une man passantmi la sô esperience. E cussì, o ai cjapât in man la gjestion cun mê sûr Michela che si ocupe de part comerciâl e aministrative de societât. Dopo, o podìn simpri contâ ancje sul jutori di gno barbe Renzo e di mê mari Aurora Contin. Ciert, no je stade une sielte facile, e in ore di vuê o ricêf propuestis interessantis di lavôr in grandis ditis.”
Nicola, che al rapresente la cuinte gjenerazion, al sa che la vite dai siei vons e je stade dute di sacrifici: “Gno pari, prime al à pensât ae buteghe e dopo al à fat la sô cjase. Chês a jerin lis sôs prioritâts! Dal sigûr, i miei gjenitôrs a àn fat une vite di sacrifici, une vite spindude dome a lavorâ, fieste e dîs di vore…”
I mobii Giarle a son cognossûts in Friûl ma ancje fûr di regjon e di là dal confin. La lôr produzion, in grande part su misure, e dopre lens cun stagjonadure ancje di cincuante agns!
“O vin un grant patrimoni di len, intal capanon. O varìn un centenâr di cualitâts. 30-40 agns fa, gno pari al viodeve i noglârs e ju comprave, e po ju secjave lui stes.”
Nicola al fâs part dal consei diretîf dal grup dai zovins imprenditôrs e dal grup Legnarredo de Confartesanât di Udin e al dîs che “la imprenditorie in Cjargne e je vive, ancje se la categorie e je rapresentade plui di personis di une cierte etât. E mancje la presince des gnovis gjenerazions.”
Ma Nicola e Michela, dongje di chei altris pôcs zovins cjargnei coragjôs, a rapresentin la sperance par cheste tiere di Cjargne che e stente a lâ indenant.“Ciert – a disin – lis scomessis no son pocjis. La strade e je di rive sù. Par nô, e je la ereditât familiâr che e incît; al è l’aiar che o vin respirât di fruts, al è il leam fuart che o vin cul nestri paîs che nus à puartât a cheste sielte.”❚
Marta Vezzi