«La musiche e je par me un cîl là che si spiele la mê anime o, come che mi plâs dî, là che si spiele la “vere” Giulia. O ai cjatât a cjase une vecje ghitare dai miei gjenitôrs e, imparât cualchi acuardi, o ai provât a meti in musiche une mê poesie. Fin chê dì o vevi scrit poesiis. Cussì e je nassude la mê prime cjançon che si clamave Nel cielo. Pensâ, cumò, che di li a plui di dîs agns dopo – o vevi 17 agns cuant che o ai scomençât a scrivi il toc – o varès publicât un disc propit dal titul Tal cîl des Acuilis, mi fâs comovi».
Al jere il Dicembar dal 2012 cuant che tal teatri di Dartigne Giulia Daici e à presentât al public l’album «Tal cîl des Acuilis». Il prin album scrit par furlan, dopo la jessude dal mini cd Attimi e il disc E poi vivere. Une racuelte, ispirade al nono, che le fasarà cognossi in pôc timp come la santule de cjançon furlane. «Dut chest al è partît dal toc No tu sês, che o vevi scrit par gno nono ancjemò tal 2002. Al è stât il gno prin toc par furlan. O vevi voie di scrivi une cjançon par lui, che i volevi cussì ben, e no podevi fâlu intune lenghe divierse dal moment che cun lui jo o fevelavi par furlan. Scrivi par furlan par me al è un mût par continuâ a fâ vivi la mê infanzie e tignîmi leade cui miei afiets. O ten vive chê part di me che e à i trats e i voi di frute ancje se aromai e cjale e e vîf il mont di grande. Par ducj chescj motîfs cjantâ par furlan, massime se fûr dal Friûl, al è stât e al è par me motîf di braùre».
Cun «Tal cîl des Acuilis» Giulia e je rivade seconde ae Targhe Tenco tal 2013 te categorie «Miôr disc par dialet e lenghis di minorance». E à partecipât a diviers festival, tant che l’Orvieto Folk Festival, il Premi par cjantautoris Bianca d’Aponte di Aversa, Carniarmonie, e à sunât a Dublin e a Londre pes inaugurazions dai Fogolârs Furlans e diviers tocs dal album a son metûts dongje par il CD Suns vol. 4 e Compilation pal Friûl di Musicologi. Tal cîl des Acuilis al è stât “sunât” e nomenât in radio e in trasmissions televisivis, e al è stât sielzût tant che disc de setemane par Un disco per l’Europa. «Ogni cjançon e conte alc di me. Come lis fotografiis tun album di foto, ven a stâi, l’album de vite: ognidune e je leade e mi ripuarte cul cûr a un gno afiet, a une mê emozion, a une mê esperience». A vincj agns dal so prin toc, che no viodin la ore che nus fasi scoltâ, Giulia si è imbarcjade in tancj progjets e esperiencis: discs, concors, premis, festivai. «Ma tal cûr mi plâs simpri visâmi di chê “prime volte”, là che dut al è nassût cun spontaneitât, passion, e amôr. E cun chescj o ai voie che e ledi indenant. La Musiche e je par me un puint che al coleghe la mê anime al mont dulintor, e e je soredut Amôr, chel universâl e chel scrit propit cu la A maiuscule». «Probabilmentri o ai cjapât cheste passion e la vôs di mê none». Fin di picinine o ai imparât a scoltâ diviers gjenars di musiche e o crôt che la curiositât e la viertidure mentâl viers diviers gjenars di musiche e e sedi une vore impuartante ancje pe composizion dai propris tocs».
Giulia e à za tal cjâf e tal cûr doi progjets: un al è il disc di Giulia Daici cjantautore, cun dentri cjançons autobiografichis e chel altri un album cun tocs che e à scrit pai plui piçui. Par restâ inzornâts e comprâ il CD, lait a cjalâ ce che e fâs sul sît: www.giuliadaici.com ❚
✒ Moira Pezzetta
