Sfuei Mensîl Furlan Indipendent
Archivi de Patrie

Furlans, scoltait la vuestre lenghe, che e je un svant e no une vergogne

Serena Fogolini
Giovanni Schiff “pre Zaneto”

A Lui a colin i 75 agns de muart
di Giovanni Schiff, passât ae storie
cul non di plume “pre Zaneto”

Salacor no ducj si impensin che tal 2022, propit tal mês di Lui, a colin i 75 agns de muart di Giovanni Schiff, plui cognossût cul non di plume “pre Zaneto”. A Fevrâr, par altri, a son stâts ancje i 150 agns de sô nassite, purpûr nissun si è inmò sbassât a ricuardâlu vie par cualchi incuintri. Alc al vignarà fat vie pe Sierade a Pavie, li che il “plevan di Percût” al fruiave il cjâf par tirâ fûr lis rimis in rût furlan che, publicadis intes pagjinis di “La Vita Cattolica” (rivade a une tiradure di 40.000 copiis propit cu lis sôs poesiis) a saressin dopo ladis ator par dut il Friûl e tal forest, a fâur compagnie ai tancj emigrâts lontans. Alc, e al merete jessi ricuardât, al è stât fat de pro loco dal Tor che, midiant di un progjet regjonâl, e je jentrade intes scuelis par fevelâ di leterature industriâl, doprant, tra i tancj autôrs, ancje i componiments di Zaneto dedicâts ae bonifiche.
◆ Probabil che dopo chestis butadis, il so non al vignarà glotût di gnûf te fumate de dismentie che simpri plui dispès si fâs sù intor dai nestris autôrs no avonde celebrâts de critiche.
◆ E al è propit chest il pont dal discors. Cui decidial cui che al vâl e cui che nol conte nuie, in dì di vuê? La culture ise pardabon espression di un popul o isal invezit il risultât des sieltis di une minorance, i inteletuâi che a scrivin intai gjornâi (che noaltris de nestre poesie no capìn nuie, al varès zontât Tavan) e che dispès a vegnin clamâts a fevelâ intes cunvignis inmaneadis di amîs e coparis di gjornâl?
◆ Cualchi timp indaûr, il president de clape “Patrie dal Friûl” al faseve notâ che intes rassegnis culturâls, il spazi dedicât ae lenghe furlane al jere simpri une vore strent. Cuasi inesistent, si podarès dî, a part chei lûcs e chei “cjavai di bataie” che – onôr a lôr – a àn savût fâ dal furlan la lôr ponte di diamant.
◆ Pal rest, incuintris disdoganâts di adalt tant che tribût ae lenghe furlane o che a deventin predicjis al desert o che a somein funerâi di stât fats ae lenghe stesse, cun dute la retoriche plene di banalitât.
◆ Abadait, no je dome une cuistion di cui che al sta parsore. Ancje noaltris, che inteletuâi no sin, o vin la nestre rate di colpis. No lant a un spetacul teatrâl, che “se o ai di spindi bêçs, tant al vâl lâ a viodi robe di professioniscj”, e di bon che a àn metût sù il Teatri Stabil Furlan, che se no la int e leve indevant a proferî che il furlan al ven doprât dome dai amatoriâi. No leìnt par furlan (e molaitle cun chê solfe dal furlan dificil di lei, che tant che ogni biel bal al à stufât e e sarès ore di ricognossi che e je dome sflacje!). No fasint cressi la lenghe cun noaltris (che se o sin cuntun forest: “o soi di dongje Vignesie” e mai “o soi dal Friûl, li che si fevele ancje furlan”) e, piês ancjemò, no lassant che la lenghe e cressi cui nestris fruts.
◆ Cheste e je la ete des presentazions e dai incuintris dai autôrs, che a ingolfin lis zornadis, nus fasin someâ plui inteligjents e po a vegnin ancje testemoneâts intal web (“se no tu sês sui social no tu esistis”). In dute cheste barafuse di events, trops sono i incuintris li che si fevele par furlan? E trops i libris par furlan? Cuasi nissun. Fintremai il premi San Simon, che si va indevant a clamâlu “oscar de leterature furlane”, al va a risi di restâ sierât intes scjatis dai magazens. Sì, parcè che de fin di Otubar dal an passât, “Cryptofriûl” di Raffaele Serafini (premi 2021) al à viodudis dome dôs presentazions, e nancje a Codroip, citât organizadore dal premi. “Silvie te catedrâl di Taragone”, di Gianluca Franco (premi 2020) e je forsit rivade a une grampe di presentazions e “Bisest”, simpri di Serafini (2019) al è stât tant disgraciât di no vênt nissune. Stes destin par chei altris concors in lenghe furlane, li che dopo no si è nancje in stât di viodi publicâts i vincidôrs.
◆ Cu lis cjançons al va un tic miôr, forsit par vie de universalitât de musiche ma, ancje alì, promovi i concierts al è simpri plui dificil e al pâr di lâ indevant a pocadis, fale che i artiscj no doprin ancje il talian, lassant al furlan lis ratatuiis.
◆ E forsit, il destin dal furlan al è propit chel di jessi deventât la jerbate di se stes. Masse folcloristic par jessi nomenât de critiche e masse lontan dai guscj de int (incjocade dai critics) par jessi considerât normâl.
◆ Ma ancje lis grandis rivoluzions a puedin tacâ di une paveute che e bat lis alis. Pre Zaneto, dal rest, nus veve metûts in vuaite: “I furlàns son cussì fìns / Di stimà nome che robe / che nass fûr dai lor confins; / Sol par cheste son lis fiestis, / i discòrs, i monumènts…”. Impensìnsal: “o sin Furlâns e pa nestre mari lenghe vin di bati pîs e mâns!”. ❚

(L)Int Autonomiste / Un popul cence plui vôs in cjapitul

Dree Valcic
✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, […] lei di plui +

L’EDITORIÂL / LA PATRIE DAL FRIÛL AL SALON DAL LIBRI DI TURIN

Walter Tomada
Dai 19 ai 23 di Mai no steit a cirînus, noaltris de “Patrie”: no sarin in Friûl, ma inaltrò.◆ No, no lìn in esili. Pal moment, jessi “furlans che no si rindin” nol è ancjemò une colpe. Salacor lu deventarà, ma pal moment o podin jessi “libars di sielzi” di lâ in “mission”. Une mission […] lei di plui +