FURLANS DIGJITAIT FURLAN. Un premi “il sît de ARLeF al vinç il premi “mediastars” te categorie “sociis culturâls” in rêt

O vevin za fevelât dal sît de Agjenzie Regjonâl pe Lenghe Furlane (www.arlef.it) in chê volte dal so licôf. Un sît moderni e funzionâl e pardabon biel di viodi che al fâs fâ biele figure no dome a la agjenzie, ma a ce che e rapresente, ven a stâi la culture de comunitât che e ten di cont e e fâs cressi il patrimoni linguistic e culturâl furlan in maniere formâl, sientifiche e istituzionâl. Poben, il nestri judizi nol jere falât, stant che chest sît, realizât de agjenzie direWeb di Udin, al à vint il “Premio Mediastars” te categorie “Sociis culturâls”. Chest concors al ten dentri lis plui impuartantis agjenziis publicitaris e di promozion dal Stât talian che a operin su la rêt. I numars a fasin capî la impuartance dal ricognossiment, stant che in totâl a àn partecipât 772 progjets di 121 produtôrs.
In zonte a chest, il sît de ARLeF al è ancje stât un dai cinc finaliscj di un altri concors indipendent che al è un dai plui impuartants tal setôr des oparis di sitografie: il “Premio Web Italia”. Intun prin moment il sît de ARLeF al jere te categorie “Aministrazion publiche”, ma stant che no jerin presints altris progjets che a meretavin, si à vût di spuestâlu in chê clamade “Copy-Writing Award”, fasint cussì pierdi la garanzie di jessi premiâts. Il sît de Agjenzie al ten dentri sei informazions su la storie, su la lenghe e su la culture furlane tes sôs difarentis manifestazions (teatri, musiche, leterature…) che comunicazions istituzionâls e juridichis, jessint la cjase dal orghin regjonâl di fonde pes tutelis de comunitât furlane. Andrea Gobbo, de agjenzie direWeb, al marche la impuartance di comunicâ ancje in forme di imagjin e di simbul par rivâ prin a trasmeti la funzion de ARLeF al utent che al rive pe prime volte sul sît.
✒ Michele Calligaris