FURLANS, DIGJITAIT FURLAN – Forvo ti trai!

Cualchi volte nus capite di no savê cemût pronunciâ ben une peraule intune lenghe foreste, o sintìn par television une pronuncie che no nus sune tant juste. La soluzion si cjatile su la rêt cuntun gnûf social network che si clame Forvo (http://it.forvo.com/), dulà che si cjatin plui di un milion di pronunciis par 268 lenghis. Lis pronunciis a vegnin dai utents regjistrâts che a puedin zontâ ancje lis peraulis che no son (al è propite specificât che ancje lis brutis peraulis a mertin un puestut). E la robe plui interessante e je che cuant che un si regjistre al met ancje di dulà che al è, cussì di permet di confrontâ i acents dai puescj. Chest po al è ancjemò plui interessant par une lenghe come il furlan, dulà che si cjatin un grum di acents diviers, un plui biel di chel altri.
UNE MAN PAR CAPÎ LA CUESTION DE GRAFIE_ Chest servizi e je une buine dimostrazion pratiche pai sostegnidôrs de grafie standard furlane. Tal sît e je presinte, par esempli, la peraule “cjase” scrite te grafie juste, e a son za dos pronunciis: chê dal Friûl centrâl cu la prepalatâl (par capîsi, plui o mancul “chiase”) e une dal Friûl orientâl cun la “c” dolce e la letare “a” finâl (“ciasa”). Duncje, pur devant di une peraule cuntune grafie comun si à di pronunciâ daûr de proprie variante.
La sezion pal furlan par dî la veretât e je par cumò avonde puare, ma sperìn che cul timp si slargjedi. Nô il nestri piçul contribût (centrâl e orientâl) lu vin dât!
________________________________________________
________________________________________________
I DÂTS DI «FORVO»
*dâts a Lui 2011
_____________________________________
LA TOP TEN DES LENGHIS PLUI “PRONUNCIADIS”
1 Inglês   116.143 pronuncis
2 Portoghês 107.181
3 Rus 92.581
4 Todesc 63.508
5 Talian 61.269
6 Francês 56.930
7 Spagnûl 54.730
8 Arab 50.655
9 Cec 40.143
10 Svedês 29.198
_____________________________________
Cussì lis lenghis di minorance Europeanis
Catalan 7.800
Ocitan 3.387
Asturian 2.111
Galês 1.267
Breton 1.010
Basc 940
Scozês 480
_____________________________________
Minorancis talianis
Sart 98
Furlan 28
_____________________________________
…e i dialets talians
Lombart 2.314
Napoletan 804
Venezian 205
_____________________________________
Dree Venier
Andrea Decorte