Sfuei Mensîl Furlan Indipendent
Archivi de Patrie

Fûr i talians!

Enos Costantin

Mancul sprocs e plui politiche, se no mandi Friûl

In Friûl o vin plui partîts: Fuarce Friûl (FF), Fradis dal Friûl (FdF), il Partît democratic furlan (PDF) e il plui penç cuntun non che al ven de nestre storie medievâl, la Peande. Cu la ecezion dal PDF ducj chescj partîts le àn in asse cui talians. I talians nus puartin vie il lavôr, i talians a puartin malatiis, nus puartin vie lis feminis, i talians a violentin lis feminis, i talians no àn chê di lavorâ, a vegnin chi par fâsi mantignî, ogni robarie e je colpe dai talians e vie indevant. Ogni tant un tren plen di talians che a scjampin de Italie par vignî a cjatâle pronte in Friûl lu fermin sul puint dal Tiliment a Tisane e cussì cheste int no sa ce fâ. Cualchidun si bute te aghe e al nade fin a Lignan, cualchidun al cor dilunc la ferade, altris a cjantin Fratelli d’Italia. Insome, ogni volte al è un calvari e un esempli di disorganizazion furlane.
◆ E pûr a son almancul 30 agns che o savevin che i talians a saressin rivâts; colpe des mafiis che ju tibiin, colpe de miserie, colpe des multinazionâls che ur robin la tiere, colpe de television furlane che ur fâs viodi un Friûl plen di feminis crotis e di vilutis monofamiliârs folcjadis di eletrodomestics come e plui dal paradîs american. Cumò, po, al è ancje il riscjaldament globâl che al draze orts e braidis e ju fâs partî come pioris cence roc cu la sperance di cjatâ un broili cuntune roiuce dulà ricreâsi.
◆ Insome i nestris sorestants a vevin dut il timp par meti une paradane politiche di une bande e supâ dentri te nestre societât un tot di fameis talianis di chê altre. Nuie ce fâ. Cumò i Fradis dal Friûl a volaressin meti une cuardemine e un cjichet sot ducj i puints de Livence e fâju saltâ par aiar. Chei de Peande a volaressin meti alpins, finançots e forestâi dilunc il confin, riclamant ancje chei che a son in pension, cussì si è sigûrs che nol passe nancje un sicilian. E se nol è avonde, si fâs un biel mûr ator ator dal Friûl: cun muredôrs talians parcè che in Friûl no si cjatin plui muredôrs, nome architets.
«Benon – al à dit il fedâr di Lungjas, parant ator il Messagjero sul taulin di formiche de ostarie – cussì cumò o volarès propit viodi cun ce che a fasin il persut chei di San Denêl se lis cuessis purcinis talianis, o di sepi Diu dulà, non rivin a passâ la Livence».
◆ Il fedâr di Lungjas al è un om plen di sintiment, e propit par chel nissun bacile daûr di lui. Dopo agns di mine in Gales al è tornât a fâ il fedâr fin che a àn sierât la latarie. Lu cjati ogni tant ta chê ostarie dulà che al è l’unic client.
«Mi va ancje ben di parâ fûr i talians – al dîs – ma dopo ce cantin varano di cjatâ fûr i partîts par vendi mignagnulis?»
◆«Par esempli, cence talians bisugnarà sierâ i cantîrs di Monfalcon dulà che no laran di sigûr a vore i triestins o i bisiacs, e nancje i furlans. Ma nol è chel che mi interesse. Jo o volarès capî ce che o volìn fâ di chest Friûl. Ancjemò centris comerciâi? Altris fabrichis par dâur lavôr ai talians? Une economie autonome o varìno di fâ blecs e tacons par une multinazionâl de peçotarie? Insome, ca di dîs, vincj agns dulà sarìno e cui sarìno? Jo ca no viôt un program, un progjet, nome cjacaris, slogans e strambolots».
◆ Cun chê, al vierç il Messagjero dulà che un grant titul al puarte la grande idee di un esponent de Peande: fâ rivâ in Friûl nome i talians di chês regjons talianis che a son plui dongje di nô. Salacor a àn une culture svilupade come la nestre. Par esempli i carinzians. Tal stes sfuei, un esponent di Fuarce Friûl al dîs che al sarès biel, ma che la Carinzie no je in Italie; anzit i carinzians no vuelin tai pîts ni talians ni furlans. Par lôr e je simpri chê gjernazie. E alore chel esponent de Peande al tache a vosonâ cuintri il razisim dai carinzians che no capissin la superioritât dal popul furlan.
◆ «Cun chestis maraveis – al dîs il fedâr di Lungjas – no si ties nissune tele ». E po, dopo resentât il gargat cuntun tai e supât i striceis dai mostacjons, mi conte de sô famee.
◆ «Jo o ai trê fîs, ducj ator pal mont, come nô une volte, ancje se no àn la valîs di carton, ma un persac colorât. Mê fie e je nassude in Gales, e à l’inglês come lenghe mari. Laureade in lenghis, e à lavorât par vincj agns a Londre intune bancje, une siore bancje. Po i è vignude chê di stabilîsi in Friûl che il puest i plâs. E à mandât curriculums aes bancjis di chenti, ma nuie. Cuant che e rivave a fâsi ricevi di un diretôr, a chel no i interessave nuie di ce che e saveve fâ. La domande e jere simpri chê: “ma jê, no cognossie nissun?”. Alore jê e diseve “metêtmi in prove un pâr di mês e se us voi ben mi tignîs, se no mandi”. Nuie ce fâ, e veve di cognossi cualchidun. Bon, par fâle curte, cumò e lavore tal Vermont, dulà che no cognosseve nissun, intun puest che i pâr di jessi in Cjargne e dîs jê. Ma cence furlans coiars o dîs jo. Gno fi, il secont, al lavore a Milan, in Italie! I è capitât di fâ cualchi “colocui” di lavôr in Friûl e lu varessin ancje cjolt, ma i davin mancul de metât dai bêçs che al vuadagne a Milan. Masse pôc. Il tierç fi al fâs il miedi in Danimarcje e no si insumie nancje di tornâ chenti. Parcè che al à la femine danese? No, al à la femine furlane, di Secuals, se al è par chel, ma a tornin nome cuant che je la fieste di Lungjas, cuant che, par une dì, il paîs al torne a implenâsi. O vuei rivâ a dî chest: une volte che o rivìn a fermâ i talians e che o vin parât fûr chei che a son chenti, ce fasìno? Se no vin un progjet, un program, nus reste il Vermont, Milan, la Danimarcje e il persacut colorât ».
◆ Martin, chest il non dal fedâr di Lungjas, al siere il Messagjero, al poie il tai su la formiche dant a pueste un colp cul veri come par dî che al è vueit, che dut al è vueit, che il Friûl al è vueit. E al tire la sô conclusion.
◆ «Tant – al dîs – i talians no tu ju fermis. No ju fermaran ni i Fradis dal Friûl ni lis Peandis cun ducj i lôr sprocs. Ce che al rive cumò e je nome une piçule cerce di ce che al rivarà; a saran milions di int in moviment. I sprocs e i mûrs no àn mai fermât nissun. Il Friûl al è vueit, vueit di ideis, di int, di zoventût, di amôr di patrie, di economie, di politiche. Ve mo, al è vueit soredut di politiche. Nome cu la politiche si pues fâ sù une societât che e ten bot. E il vueit, voaltris mi insegnais, in nature nol esist. Timp o tart, plui timp che tart, al ven dongje alc a incolmâlu. E mandi Friûl». ❚

 

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +