Sfuei Mensîl Furlan Indipendent
Archivi de Patrie

FUEN a congrès, ELEN in assemblee e il Parlament di Madrid al devente plurilengâl

Marco Stolfo

Al è timp di congrès e di assembleis par diviersis entitâts che a nivel european, tra politiche e culture, a sburtin lis rivendicazions in cont di autoguvier, identitât e dirits di fonde fatis indenant de bande di minorancis e nazionalitâts.
◆ Dai 7 ai 10 di Setembar stâts a Pécs-Pečuh-Fünfkirchen, in Ongjarie, si à davuelt il congres numar 67 de Union Federâl des Nazionalitâts Europeanis (FUEN), federazion che e ten dongje passe cent organizazions che a son espression di diviersis comunitâts che a son in vincjesîs diferents stâts de Europe. E je stade la ocasion par fâ il pont de situazion sei a nivel teritoriâl e statâl sei intal contest continentâl. Cun di plui a son stadis cjapadis in considerazion lis gnovis domanidis di adesion. Une di chês e jere chê de Societât Filologjiche Furlane (SFF), che e à vût bon acet. Cussì cumò ancje une entitât espression de comunitât furlane e fâs part de FUEN. Al è un fat impuartant, par plui resons, ma no je une novitât in tiermins assolûts. Cun di fat intai doi congrès fondatîfs de FUEN, tal 1949, e jere ancje une delegazion furlane e dilunc vie dai agns Sessante il Friûl al jere rapresentât inte Union de bande de clape Int Furlane.
◆ Ai 7 di Otubar a Casteddu-Cagliari e je impen convocade la assemblee gjenerâl de Rêt Europeane pe Avualiance des Lenghis (ELEN), organizazion che e je in vore dal 2011 e là che si dan adun 174 associazions e istituzions che a rapresentin cincuante comunitâts linguistichis che si cjatin in vincjecinc stâts dal continent. La Assemblee si davuelç in bande dal Babel Film Festival, concors internazionâl dedicât ae produzion audiovisive intes lenghis minorizadis e doprant ancje altris lengaçs “margjinâi”, in program inte capitâl de Sardegne dai 2 ai 7 di Otubar. Tra i argoments che a vignaran frontâts e sarà par sigûr ancje la iniziative dal guvier dal Ream di Spagne par che il catalan, il basc e il galizian a vegnin ricognossudis tant che lenghis uficiâls de Union Europeane (UE). In cont de cuistion ELEN e à cjapât posizion a pro cuntun comunicât che al è stât dât fûr ai 18 di Setembar stâts, marcant che dant acet ae richieste di Madrid la UE e fasarès un pas indenant inte direzion concrete de «unitât inte diversitât» e domandant ai Stâts membris de Union di frontâ la cuistion in maniere positive. La domande fate indenant dal ministri spagnûl pai afârs forescj, José Manuel Albares, no je stade ancjemò cjapade sùù de bande dal Consei de UE, intant che a son in vore mobilitazions sei a pro sei cuintri, a Bruxelles e in diviersis capitâls europeanis. Par esempli il guvier svedês al à fat savê che «al è ancjemò masse adore par fevelâ dal argoment», intant che a Parîs a domandin che al sedi fat «un studi juridic di pueste» prime di viodi de cuistion.
◆ Cundut achel il guvier di Madrid, ancje par resons di politiche interne (cemût che o vevin sclarît sul numar passât de Patrie), al mostre di jessi determinât in chê direzion e al sburte soredut pal ricognossiment dal catalan, stant che e je une lenghe doprade di sùù par jùù dîs milions di lôr, che a son une vore di plui dai locutôrs di cetantis lenghis che a àn za il status di uficialitât inte UE, doprant la argomentazion retoriche de consistence numeriche.
◆ In spiete di viodi ce che al nas, buinis gnovis pes lenghis “altris” dal Stât spagnûl a rivin dal Parlament. Cun di fat, tacant dai 21 di Setembar stât i deputâts si viodin ricognossût in maniere formâl il dirit di doprâ catalan, basc e galizian intai lavôrs inte aule. La promesse fate de gnove presidente de Cjamare, la socialiste maiorchine Francina Armengol, dopo de sô elezion, ai 17 di Avost, e je stade manignude. ❚

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +

Gnovis / Brâf Agnul! La to vôs e fâs onôr al Friûl

Redazion
O saludìn cun braùre e emozion il Premi Nonino Risit d’Aur che al è stât assegnât a Agnul Floramo, un inteletuâl di gale che i letôrs de “La Patrie dal Friûl” a cognossin di agnorums in dut il valôr des sôs ideis: difat al à scrit sul nestri gjornâl centenârs di articui e cun nô […] lei di plui +

L’EDITORIÂL / Parons vecjos e gnûfs de informazion

A i 24 di Mai dal 1946, juste trê mês dopo che pre Bepo Marchet e Felix Marchi a vevin fondade “La Patrie dal Friûl”, un grup di industriâi triestins al à screât a Udin un gjornâl cuotidian clamantlu “Messaggero Veneto”. In chê volte Carlo Tigoli, il diretôr, e ducj chei che lu àn finanziât, […] lei di plui +