FRIÛL FUR DAL FRIÛL. Vivi in Friûl, une sielte che e plâs

Joibe grasse a Distrà, une frazion di Spilimberc strete jenfri la Cose, i ultins Magrêts e la Pedemontane. Intune ostarie che nus puarte indaûr ai agns ‘50, o cjatìn Jackie Lewis e Patrizia Leonarduzzi, amiis di cuatri agns ma leadis tant che a fossin zimulis.
Patrizia e je fie di un mosaicist di Spilimberc lât a vore in France par realizâ i mosaics dai sacrari dai cjadûts americans de Seconde Vuere Mondial. E je nassude in Friûl par sielte di sô mame che, pocs dîs prime dal part, e veve cjapât il tren di Parîs par vignî ca. La dì dopo la nassite, Patrizia e jere za in sagre: forsit ancje par chel che la bocje di ridi e la felicitât no i mancjin mai. Tornade a pôcs mes sot la tor Eifell, fin aes scuelis elementârs e je stade tirade sù a “furlan e furlan” ma nol è stât par nuie dificil il so percors scolastic, lât indenant fin ae maturitât in Corsiche. A diference di Parîs, dulà che la presince furlane tai agns ‘60 e jere fuarte, te isule denant di Gjenue i nestris a jerin pôcs ma atîfs e ben integrâts intun ambient sensibil aes tematichis autonomistichis. No cate il paisaç a misure di om, Patrizia e à simpri puartât il Friûl tal cûr, tant che a Padue, tes grandissime aulis de facoltât di agrarie de universitât, intant dai dîs dal taramot, e à cjatât par câs un altri furlan che po dopo al è deventât il so om. Di chê volte, Patrizia e à decidût di stabilîsi a Distrà dulà che e dîs: «O ai podût florî e esprimimi in ducj i aspiets de vite». Ativissime tal volontariât fin dai timps de associazions “T.U.P.U.S.” di Navarons, tal Istitût Ladin Furlan Pre Checo Placerean, in politiche e te aministrazion locâl dulà che la sbare e je stade simpri drete a favôr de nestre lenghe e culture, la sô vitalitât e à tacât ancje Jackie, inglese doc de Cornualie. Jackie, daspò trente agns di lavôr tant che ricercjadore intune multinazionâl farmaceutiche, insiemit a Steve (so marît) si è svicinade al Friûl. Prime pôcs dîs a cjatâ i parincj dal so om, po un mês, e in fin la sielte de vite: Friûl, incoragjâts dai fîs. Di cuatri agns, Distrà e je deventade la sô gnove cjase, lontan de frenesie e dal stress dal pendolarisim metropolitan. Jackie si è butade cun passion tal sport e tal associazionisim, e à strenzût un biel grum di amiciziis, concuistadis ancje cun dolçs inimitabii. «Il gno om, a sessante agns finîts, si è sintût pe prime volte a cjase», e dîs Jackie. «Jessi partecipe de vite furlane, cu la sô discrezion e cul so rispiet pe vite, pal vivi comunitari, cu la solidarietât e la ligrie des sagris, nol à valôr». ■
Daniele Martina