Cuâl isal il cuadri tipic dal Friûl? Domande dificile, ognidun di nô al darà une rispueste difarente come che son difarentis lis varietâts de lenghe furlane di paîs in paîs. Portofino al à il so golfut cu lis cjasis coloradis, Piran i tramonts su lis salinis di Sicciole, Rovigno batanis e abitazions che a vegnin sù dretis dal mâr, Vignesie puints e canâi, la Austrie e la Svuizare lis malghis cui prâts. In Friûl si pues cjatâ dut chest e no dome. O sin une tiere di grancj pitôrs astrats, ma nol mancje un gjenar dut particolâr, “nestri”, familiâr, intim ma coletîf, di une impuartance storiche e antropologjiche straordenarie.
REALISIM NESTRI_ Otto D’Angelo, classe 1923, al è dal sigûr il plui grant esponent di chest stîl “nestri”, un fotograf su tele che cu lis sôs pineladis nus cjante cun realisim la vite dai prins 60 agns dal 1900. Otto al à passade la sô infanzie a Sunviele a cjaval di dôs vueris mondiâls, che insiemit ai muarts a àn soterât, cuntune velocitât mai riscuintrade te storie de umanitât, la culture agricule di dut l’Ocident. Otto al à timp par stampâsi tal so cjâf senis e situazions, vicendis e colôrs che tal zîr di une gjenerazion si saressin confinâts tes fotografiis in blanc e neri o tai ricuarts dai vons. A diference di tancj, la piture par Otto e je stade un mistîr fin di zovin.
EMIGRANT ANCJE LUI_Partît pe Francie za tal 1946 al à vude une cariere impuartante tal mont dai fumuts (si pues dî che al è stât il prin di une lungje tradizion furlane che e dure inmò vuê), tai romanç ilustrâts (Boléro, Intimité) precursôrs dai “fotoromançs”. Interessantis a son stadis ancje lis cuviertinis dai romançs “Casanova”, “Quo vadis” voltâts dal talian al francês, o, tal sport ilustrât, lis sôs innomenadis “cronachis dissegnadis” su la riviste “France Futbal”, come che a son ventadis famosis simpri in cjamp sportîf in Francie lis sôs pituris murâls di grandis dimensions.
DI GNÛF IN PATRIE_Tal 1958 Otto al torne e si ferme in Friûl dulà che a Udin al vierç un dai prins studis publicitaris che al progjetarà etichetis, manifescjm cjartis topografichis ancjemò dopradis e preseadis. Famosis a son lis etichetis des scjatis di persut di S. Denêl, i manifescj de sagre dai mus di Feagne, lis publicitâts pes cantinis sociâls e lis monts che si puedin cjantâ suntune vore di cjartis Tobacco.
Ancje in Friûl Otto nol sbandone il mont dal “patinât”, lis sôs “pituris dal vêr” a deventaran cussì innomenadis che Olivero Noschese in visite a Udin si fasè compagnâ li dal nestri pitôr par fâsi fâ un ritrat, o come ancje bramât des fantatis al jere un concors di bielece che al veve come prin premi la esposizion dal propri ritrat firmât “Otto” tes vetrinis des buteghis plui a la mode.
LA PITURE DE MEMORIE_ Dal 70 in ca la svolte, e rive la piture dai ricuarts, lis telis de storie. Otto al scomence cul dissegnâ la place di Sunviele prime de vuere par no fermâsi plui fasint tornâ a vivi cjantons, sueis, cusinis, stalis, cjamps, trois, canâi, musis strachis, feminis che a dan di tete ai fruts, morôs contents, emigrants che a partissin par cuissà dulà e tantis altris esperiencis dal nestri Friûl. I paisaçs e lis storiis di vite vivude di Otto a van di une bande a di chê altre dal Friûl, da la Cjargne al mâr, di Gurize a Cordenons e i siei cuadris a son sparniçâts ator pal Mont, dal Canadà a la Francie, dai Usa a la Cine.
Il sucès des oparis di Otto al è grandonon tai fogolârs dai emigrants e pai lôr disssendents, parcè che i siei colôrs a fasin tornâ sù i ricuarts plui lontans, lis visions di paîs baratadis par simpri dal boom economic e dal taramot.
Cui che al cjale un caalis di Otto al vierzarà un biel libri di storie contemporanie, cui che al larà a viodi une sô mostre (la prossime e je a Cjavàs, cjalait il box ta cheste pagjine, ndr) al cjacararà cuntun brâf antropolic, cui che al incuintrarà il nestri pitôr, ancje dome par pocjis oris, al varà la furtune di assisti a une rare lezion di vite, a une infornade colorade di passion e si puartarà a cjase testemoneancis che a riscjin di jessi dismenteadis par simpri. ■
Daniele Martina
Stin dongje ae Patrie
Redazion
La seconde edizion de manifestazion “Stin dongje ae Patrie” e rapresente un moment di incuintri e di solidarietât cul mensîl “La Patrie dal Friûl”, gjornâl scrit fûr par fûr in lenghe furlane fintremai dal lontan 1946. Inte serade, che e sarà presentade dal diretôr Walter Tomada e di Serena Fogolini, si daran la volte musiciscj, […] lei di plui +
Pirulis di musiche e di storie / Un pitôr musicâl di San Denêl tal inovâl de sô muart: Giulio Urbanis (1540 – 1613)
Alessio Screm
Stant che tal articul chi sore o ai scrit di iconografie musicâl, la pirule di storie e di musiche di chest mês si intive a celebrâ un pitôr furlan che al à dât cetant in fat musiche piturade, e di lui si celebrin chest an i cuatricent e dîs agns de sô nassite. Lui al […] lei di plui +
Il cjastelîr plui grant di simpri / Sot des pleis de tiere: ae scuvierte de origjin dal çuc di Udin
Serena Fogolini
Daûr di une liende, di un proverbi o di une conte popolâr si plate simpri une fonde di veretât Al sarà forsit par cheste reson che cualchi mês indaûr, jessude la gnove di studis sientifics che a dimostravin la artificialitât dal çuc di Udin, nissun di noaltris si è maraveât plui di tant. Dal rest, […] lei di plui +
Lenghe / A Cormons si fevele dal furlan te informazion
Dree Valcic
L’impuartance dai mieç di comunicazion par la difusion de lenghis minoritariis. Cun Emanuele Galloni, Guido Germano Pettarin, Andrea Valcic. Al à moderat Wiliam Cisilino. lei di plui +
Musiche / Carniarmonie: trentedôs stagjons di armoniis te mont furlane
Alessio Screm
Il festival che al met in rêt midiant de musiche Cjargne, Valcjanâl e Cjanâl dal Fier A son trentedoi agns che la Cjargne e je protagoniste di armoniis musicâls estivis, graciis al festival de mont Carniarmonie, la prime vere rassegne musicâl che e à pandût une maniere di fâ culture che cumò e je cetant […] lei di plui +
La tiere e la grepie / Lis âfs (ancje chês cjargnelis) a svolin ancjemò sui cjamps dal Friûl
Adriano Del Fabro
Al cres il numar dai apicultôrs e dai bôçs, cundut des tantis dificoltâts che il setôr al à vût, che al à e che al è daûr a frontâ A son stâts agns dificii, tal passât, pes âfs (Apis mellifera) e pai apicultôrs. Prime preocupâts e in difese pai atacs dal acar Varroa; dopo i […] lei di plui +