FRIÛL EUROPE. Zornadis di lenghis, di dirits e di autodeterminazion

Il mês di Setembar, che al è a pene finût, al ufrìs ogni an ricorencis impuartantis par cui che in Europe i ten ae diversitât linguistiche, al dirit ae lenghe e aes lenghis, al autoguvier e ae autodeterminazion. Al è il câs dai 26 di Setembar, che tacant dal 2001 e je la Zornade europeane des lenghis: une ocasion di riflession coletive che e tocje propit il pluralisim linguistic e la cognossince e l’ûs di plui lenghis, tant che valôr culturâl, dirit di fonde e oportunitât educative, formative e socioeconomiche.
Une altre date clâf e je chê dai 11 di Setembar. Par ce che al tocje lenghis, dirits e istruzion – lu ricuardavin un an indaûr juste ta cheste pagjine – al è l’inovâl di diviersis iniziativis cjapadis sù de bande dal Parlament european tai ultins agns. Tra storie, memorie e rivendicazions di identitât e di autoguvier, chê stesse zornade e je chê de “Diada”, la fieste nazionâl catalane, e des mobilitazions a pro de indipendence de Catalogne. Cun di plui, chest an, in chê date si vierzeve la campagne eletorâl pal vôt «autonòmic» dai 27 di Setembar, là che la sielte dai parlamentârs de Generalitat e à cjapât sù ad in plen ancje un altri significât, in continuitât cul referendum pe indipendence dai 9 di Novembar stâts, mai ricognossût di Madrid.
Tal moment che o sierìn il gjornâl, nus rivin lis primis informazions di Barcelone in cont dai risultâts: lis listis indipendentistis – di une bande il rassemblement ‘Junts pel Sì’ e di chê altre la çampe alternative de Cup – a restaressin par pôc sot dal 50% plui un dai vôts, ma a varessin la maiorance assolude des sentis in Parlament. In chestis cundizions, si puest fevelâ sei di vitorie storiche che di sucès smiezât. Chi di cualchi setemane si capirà miôr ce che al nas in Catalogne. Par sigûr a saltin fûr daurman doi elements: la petenade che a àn cjapade i partîts spagnûi e spagnoliscj (Pp e Psc-Psoe) e il sucès invezit de Cup, che in confront cul 2012 e moltipliche par trê la sô percentuâl e il numar dai siei rapresentants tal Parlament di Barcelone, tant a dî che la cuistion catalane e je ancje une cuistion sociâl.
Chê dai 27 di Setembar e je une date impuartante, che e sa di Europe e di dirits, ancje pal Friûl e pai furlans. In chê date di vincj agns indaûr il Consei regjonâl dal Friûl-VJ al faseve buine une prime version di chê che e sarès deventade la Leç regjonâl 15 dal 1996 pe tutele e pe promozion de lenghe furlane. Chel test di leç al vignive fermât dal Guvier talian par vie che… al jere masse european, a tacâ di un riferiment masse fuart ae ‘Cjarte europeane des lenghis regjonâls o minoritariis’, in chê volte nancje firmade de bande di Rome.
In chê ocasion la Regjon e rispuindeve aes obiezions dal Guvier cun decision e cun diplomazie: il test al tornave in Consei e al vignive fat bon cualchi mês plui indenant cun cualchi modifiche di caratar formâl ma cence mudâ l’implant inovatîf e european dal proviodiment. Di une bande al ven di dî che, magari cussì no, a jerin altris timps. Di chê altre, pe lontanance dal Stât talian rispiet ae Europe dai principis di fonde e dai dirits, al somee che nol sedi cambiât nuie. ❚
Marco Stolfo