La Aleance Libare Europeane, 40 agns di storie de bande dai popui e dai lôr dirits

La Aleance Libare Europeane (ALE) e finìs i siei prin cuarante agns di vite. Chel che in dì di vuê al è il “partît politic european” che al ten dongje cuarantesiet moviments e partîts che si presentin tant che la espression politiche plui sclete di nazionalitâts, minorancis o regjons in Europe, al nasseve in maniere uficiâl ai 9 di Lui dal 1981. In chê dì e vignive fate buine la Declarazion de convenzion di Brussel, clamade ancje «Cjarte pe Europe dai popui», un document che in chel istès al jere il so manifest programatic e il so at costitutîf. La Aleance e nasseve tant che «associazion di cooperazion là che si dan adun partîts politics che si tegnin fûr dai schemis dal pinsîr politic tradizionâl, stant che a metin in prin plan un regjonalisim integrâl, che al à une concezion che si fonde su la relazion positive tra identitât individuâl e identitât di popul, che e cjate la sô espression struturâl intes decisions democratichis armonizadis daûr dal model federâl, e che e ricognòs il valôr de diversitât e de justizie sociâl».
◆ Tra i fondadôrs de ALE a jerin il Partît nazionâl frison (FNP), la Unione di u Populu Corsu, la Union Valdôtaine (UV) e la Volksunie (VU), il partît democratic flamant, che za intal 1979 si veve presentât aes primis elezions europeanis cuntun program orientât bande un federalisim european democratic, basât su regjons e nazionalitâts (i popui di Europe) e fasint indenant la costituzion di une aleance tra organizazions politichis cun  chê stesse ispirazion (la ALE, riclamade ancje inte denominazion de proprie liste eletorâl: Volksunie in de Vrije Europese Alliantie).
◆ Il percors inviât in maniere uficiâl in chê volte al jere za tacât cualchi timp prime. Cun di fat, intal 1979, compagn de Volksunie, ancje altris grups politics nazionalitaris e regjonaliscj si vevin presentâts intes primis elezions europeanis, tirant dongje in cualchi câs ancje consens significatîfs, e tra Jugn e Avost di chel stes an i lôr rapresentants si vevin dât adun in doi incuintris a Brussel e a Bastia. Cun di plui, bielzà tal 1975, uns pôcs di chei che a saran i fondadôrs de ALE si vevin dât dongje intun “ufici des nazions cence stât”, marcant za in chê volte che la union de Europe, par che e fos pardabon rispietose des diversitâts e dai dirits, no podeve fondâsi dome sui stâts, parcè che se e ves fat cussì e sarès lade dilunc a meti in vore chês injustiziis e chês opressions che a son tipichis dai «stâts cun struture centralistiche». Ma salacor resonaments di cheste fate a jerin stâts fats indenant ancjemò prime, za inte prime metât dal Nûfcent, intant e dopo de Vuere grande, vie pe Resistence e juste dopo de fin dal Secont conflit, e po ancjemò tai agns Sessante.
◆ Tacant de sô fondazion, la ALE e je lade dilunc a disvilupâ un plateforme programatiche che si fonde su federalisim integrâl, dimension regjonâl, valorizazion dal pluralisim culturâl, promozion des lenghis minorizadis, disvilup economic ecuilibrât e sostignibil, concertazion sociâl e solidarietât sedi in Europe sedi cul rest dal mont. La Aleance e je stade simpri presinte inte aule di Strasburc cui siei eurodeputâts e vie pes legjislaturis e je lade dilunc a infuartî la sô colaborazion cui Verts, che si palese ancje inte creazion dal grup comun intal Parlament European.
◆ Impegnade, tes istituzions e tai teritoris, in cetantis bataiis democratichis e europeistis sui temis de partecipazion dai citadins, de tutele des minorancis, dal rispiet dai dirits umans e de sostignibilitât economiche e ecologjiche, la ALE e je lade dilunc a marcâ il so profîl di formazion politiche europeane progressiste, cun riferiment sedi ai temis sociâi sedi ae prospetive de unitât europeane.
◆ La Aleance intal 1994 si à costituide in federazion di partîts politics, in conformitât cu lis disposizions dal articul 138A dal Tratât di Maastrich, cu la denominazion di Partît democratic dai popui di Europe (ALE-PDPE), e po tant che che vêr e propri “partît european”, cemût che al è stât ricognossût in maniere uficiâl ai 13 di Otubar dal 2004. A fasin part de ALE ancje la Slovenska Skupnost, Patrie Furlane e il Pat pe Autonomie. ❚