AUSTRIE. Cence judizi!

La valutazion dal an passât
e la scree di chel che al vignarà
a metin in dificoltât lis fameis
Ripeti l’an? In timp di COVID al è impussibil, in biele sostance, a pensin cetancj scuelârs. In merit ae promozion cuntun judizi “No suficient”, a àn reson, par vie che chest al è previodût intal câs che no si vedi za vût une insuficience inte stesse materie vie pal an scolastic di prime e se la materie e ven tornade a presentâ in Autun. Invezit al è pericolôs cjatâsi cuntun “No valutât”, stant che in chel câs par leç no je pussibile nissune promozion. Pe conclusion positive di un grât scolastic (in Italie si fevele di “classe”) la pagjele e à di vê segnât un judizi in ogni materie obligatorie. Si che duncje, se un student nol à vût une valutazion intune o plui materiis, e il dirigjent scolastic nol à concedût un esam di recupar par vie che a son mancjadis lis cundizions necessariis, il consei al à di decidi che il scuelâr nol pues jessi ametût ae promozion. Daûr di un studi carinzian, intant de dade dal “Homeschooling”, che ca di nô si clamilu “didatiche a distance” o “DAD”, nol è stât pussibil – o in tancj câs al è stât cun cetante fadie – rivâ al vot par cent dai scuelârs (5400 canais sù par jù). Chest al vûl dî che a mancjin lis provis di rindiment, sicu compits e colaborazions di cualchi fate, e chest al podarès puartâ a un “No valutât” dai arlêfs, situazion che e tocje ancje i 900 scuelârs che i gjenitôrs no vuelin fâur fâ il tampon nasâl o che a son classificâts tant che pazients a risi e che par chel intal ultin cuadrimestri no àn mai vût part al insegnament in presince. Ducj i gjenitôrs che i fîs a riscjin un “No valutât” a vignaran informâts intai dîs cu vegnin (tignît ad a ments che in Austrie la scuele e finìs tor dai 10 di Lui, ven a stâi un mês plui tart di ca di nô, cundut che lis zornadis di scuele a sedin lis stessis, ancje se cuntune divierse distribuzion). I scuelârs a saran invidâts a passâ un esam che al mostri la lôr preparazion e che al permeti inalore di pandi un judizi. Chest esam – pes materiis obligatoriis e principâls, sicu matematiche, todesc, lenghe foreste, storie, gjeografie, siencis e v.i. – al varà di jessi scrit e fat in presince, ven a stâi a scuele, tant che i canais a varan di scugnî sometisi a un tampon par podê jentrâ intai locâi de scuele. Al somee propit di mangjâsi la code. A son setemanis che i gjenitôrs a jemplin di telefonadis lis direzions didatichis, incolpantlis di obleâ a fâ il tampon e fasintjur part che i lôr fîs no laran a scuele par fâ i esams. Par consecuence, i legâi dal dipartiment scolastic a previodin par chest an une fuarte incressite di ricors, par contrastâ la decision de comission dai scrutinis o dal consei di classe intal câs di judizi di ripeti l’an.
◆ Dal sigûr al è dificil di valutâ se lis dificoltâts de didatiche a distance a sedin reâls o nome presumudis, ancje se si à di dî che in Austrie l’ADSL al è rivât su cuasi dut il teritori za fa vincj agns. Dut câs, a son ancje altris cuistions a vuastâ i risultâts e la valence de DAD, ma almancul a son stât metûts limits precîs e criteris di valutazion, che ca di nô a somein sometûts, par vie de pandemie, a pro di un “sîs politic” par ducj. La consecuence par nô e sarà chê di un nivelament al bas, cun efiets pençs sul nestri avignî, che propit i nestris fîs a saran clamâts a gjestî. ❚