Un pas une vore piçul viers la Europe, un patafon delicât ma fuart de bande de Europe. Par ce che al tocje la tutele des minorancis, la promozion dai dirits linguistics e la valorizazion de diversitât culturâl, il Stât talian al va di lunc a vê une vore di dificoltâts tal rispietâ i standards definîts a nivel internazionâl e tal meti in vore metude il stes principi di fonde che al ven proferît dal articul 6 de sô Costituzion.
Cheste situazion si palese ad in plen intal contest continentâl e in particolâr tes relazions complicadis tra lis istituzions di Rome e il Consei de Europe, par ce che al tocje lis convenzions europeanis dedicadis a chestis cuistions, fatis buinis a Strasburc tai ultins vincjecinc agns, ven a dî la Cjarte europeane des lenghis regjonâls e minoritariis, che e je dal 1992, e la Convenzion cuadri pe protezion des minorancis nazionâls, cjapade sù tal 1995.
In cont de prime, il Stât talian al fâs part de liste, avonde lungje, dai Paîs che no le àn ancjemò ratificade. Pe seconde, impen, al è un di chei che si son impegnâts par prins par metile in vore (ancjemò tal 1997), ancje se fin cumò al à fat pardabon pôc par mantignî i impegns cjapâts sù cu la sô ratifiche.
La cuistion e à cjatât une gnove conferme cu la risoluzion CM/ResCMN(2017)4, fate buine a 5 di Lui stâts de bande dal Consei dai Ministris dal Consei de Europe. Il document al siere il cuart cicli di monitorament in cont des azions pe tutele des minorancis metudis in vore (plui o mancul…) de bande de Republiche taliane, juste daûr de ratifiche fate vincj agns indaûr, e al marche, cuntun lengaç diplomatic che in chel istès al è fin e dûr, che al è ancjemò cetant ce fâ.
Tantis osservazions a tocjin la normative: o che no esist – e chest al è câs dal proviodiment pes popolazions rom e sinti – o ben che e esist, ma no ven metude in vore ad in plen, cemût che o savìn ancje masse ben, sei pe innomenade leç statâl 482/1999 che pe legjislazion regjonâl.
Il Comitât dai ministris dal Consei de Europe al bat soredut su la necessitât di garantî pardabon l’ûs des lenghis des minorancis tai media – te stampe, par radio e par television – e in chest setôr il dêt al è pontât sul vueit che al è ancjemò tal servizi public radiotelevisîf. Cun di plui al met in evidence che si à di fâ di plui a pro de presince des lenghis minorizadis te societât, tes istituzions e tai servizis pai citadins, e a pro dal lôr insegnament e dal lôr ûs normâl tes scuelis. Lis indicazions a son claris e fuartis: formazion pai insegnants, materiâi didatics, sportei linguistics che a funzionin miôr e azions di planificazion linguistiche.
Strasburc al pant une preocupazion fuartonone ancje in cont de situazion dai rom e dai sinti e, plui in gjenerâl, de brute clime di intolerance che e je in Italie, cuintri dai imigrâts, di chei che ju clamin «zingars» e des «minorancis linguistichis storichis».
Viodarìn cemût che a rispuindaran in concret di Rome. Par intant al merete segnalât che ai 2 di Avost stâts la Prime e la Tierce comission dal Senât a àn sierât l’esam de propueste di leç di ratifiche de Cjarte europeane des lenghis regjonâls o minoritariis, che cumò e je pronte par rivâ te Aule di Palaç Madama.
Il test saltât fûr al manten l’implant ecuilibrât che al veve te sô version origjinarie, presentade ancjemò tal imprin de legjislature, però pal moment no si sa cuant che al podarà jessi votât. Par chel plui di cualchidun al à il dubi che ancje par cheste volte no si rivarà ae suspirade ratifiche e che il piçul pas avostan nol sedi nuie altri che une operazion di propagande. Sperìn che nol sedì cussì.
di Marco Stolfo