FRIÛL EUROPE. Italie a cessecûl

Il Consei de Europe al torne a tirâ lis orelis al Stât talian in cont dal nivel ancjemò masse bas di tutele che al ven garantît aes minorancis. Ai 4 di Lui stâts il Consei dai Ministris di chê che e je la plui viere des organizazions intergovernativis europeanis – e je stade costituide tal 1949  –  al à fat buine une risoluzion che e tocje la metude in vore de bande dal Stât talian de Convenzion di suaze pe protezion des minorancis nazionâls.
Il document al conferme lis osservazion fatis indenant inte “Tierce Opinion su la Italie” presentade za tal 2011 de bande dal Comitât tecnic consultîf che al sta daûr de aplicazion Convenzion, ratificade de bande de Republiche taliane tal 1997. Di une bande, al ven preseât il fat che tai agns passâts, dal 2005 al 2009, a sedin stadis fatis buinis, a nivel regjonâl, gnovis leçs di tutele. Di chê altre e ven palesade une liste di preocupazions di sgrisulâsi: la partecipazion ai procès decisionâi de bande des personis che a fasin part des minorancis e je ancjemò limitade; l’insegnament e l’ûs des lenghis minoritariis tes scuelis al cjate ostacui di ogni sorte, a tacâ des risorsis economichis che a son scjarsis e a son daûr a lâ ancjemò al mancul; i tais ai fonts a àn limitât l’impat positîf de metude in vore de normative di tutele no dome inte scuele, ma ancje par ce che al tocje l’ûs des lenghis propriis tai rapuarts tra citadins e istituzions, tai servizis publics, tai media e te produzion culturâl.
Magari cussì no al piês no son limits, cemût che a mostrin lis gnovis riduzions dai finanziaments statâi e i contignûts di ciertis iniziativis legjislativis e aministrativis. Chest al salte fûr tal stampon di chê che e varès di deventâ la Leç di ratifiche de Cjarte europeane des lenghis regjonâls e minoritariis, che e fâs fîs e fiastris tra lenghis e comunitâts. E je compagne ancje la impostazion dal decret dal guvier pe spending review e dal so document tecnic di compagnament, là che si fevele di scuele e minorancis doprant espressions tant che “madre lingua straniera” e “particolari dialetti”, che intun colp sôl a fasin cuintri al dirit, al bon sens e ancje ae lenghe taliane. Plui che revision de spese, revisionisim legjislatîf: cence logjiche e cence legjitimitât. ■
MARCO STOLFO