Il Friûl protagonist aes European Charter Classroom Activities

Il progjet, cofinanziât dal NPLD,
al à di disvilupâ un percors didatic par aprofondî i ponts
de Cjarte europeane des lenghis regjonâls o minoritariis
E  je stade fate a Trent il prin di Otubar la cunvigne finâl dal ECCA – European Charter Classroom Activities, là che e à partecipât ancje une delegazion in rapresentance dal Friûl, di là di chê dal Trentin (pal ladin, mochen e cimbri), de Frisie (pal frison), de Comunitât valenciane (pal catalan) e de Romanie (pal ongjarês). Il progjet, cofinanziât dal NPLD – Network to Promote Linguistic Diversity, la rêt paneuropeane cun sede a Bruxelles che e lavore tal cjamp des politichis linguistichis, al è nassût tal 2019 cul obietîf di disvilupâ un percors didatic indreçât a aprofondî i ponts contignûts te Cjarte europeane des lenghis regjonâls o minoritariis. Al à fat interagjî cetantis regjons, coinvolzint, di une bande, scuelis e arlêfs e, di chê altre, universitâts e partners istituzionâi.
◆ Pal Friûl e je stade cjapade dentri cualchi classe dal Istitût “Magrini Marchetti” di Glemone, e altris dal Istitût comprensîf di San Denêl e di chel di Tumieç. Di valôr alt ancje la partecipazion de Universitât dal Friûl: dai 3 ai 19 di Mai passâts, il CIRF – Centri interdipartimentâl pal disvilup de lenghe e de culture dal Friûl, e il DISG – Dipartiment di siencis juridichis a àn inmaneât il seminari “Tutele des minorancis e dirits linguistics in Europe: la Cjarte europeane des lenghis regjonâls e minoritariis”, indreçât ai students che, dopo di 5 lezions, a àn sostignude une prove finâl.
◆ Tal imprin, in 12 mês, l’ECCA al varès vût di cjapâ dentri students (e i lôr docents) intune schirie di scambis linguistics e culturâi. Par vie dal sprolungjâsi de emergjence pandemiche, e dopo di une prime posticipazion, chestis iniziativis a son stâts anuladis in maniere definitive. Cun dut achel, il progjet al è lât indenant e al à permetût aes classis interessadis di produsi une vore di materiâi. I students a àn partecipât al concors “Ce significhie par te la tô lenghe, cumò e tal avignî?”, che si è sierât cu la creazion di une schirie di videos che a àn marcât i caratars specifics des regjons che a vevin partecipât. E je stade fate ancje la traduzion des ativitâts scolastichis dal inglês aes cinc lenghis des regjons. Cul tacâ de pandemie, al è stât produsût un poster cun dentri une schirie di indicazions par prevignî il slargjâsi dal virus, ancje chel voltât tes lenghis regjonâls e insiorât cu lis ilustrazions dal fumetist trentin Fabio Vettori, e ancje mascarutis di pueste, mandadis a docents e a students. I partners frisons a àn creât lis lezions ECCA, un volantin e une mape des lenghis minoritariis rapresentadis dal NPLD. La cunvigne finâl di Trent e je stade une ocasion par presentâ e par favorî la plui grande difusion e cognossince dai materiâi produsûts (a nivel scolastic e academic), de esperience realizade e des ativitâts fatis. Ma e je stade ancje une maniere par butâ lis fondis di colaborazions futuris, te sperance di podê tornâ a proponi e disvilupâ dal dut lis ativitâts planificadis sul imprin. ❚
Redazion