Un jutori aes piçulis buteghis di mont

Cuant che lis piçulis buteghis di paîs in mont a puedin dâ il lôr contribût par inviâ gnovis formis di benstâ comunitari. Al è l’obietîf dal progjet “Innovalp Experiences: nuove forme di welfare comunitario”, promovût de cooperative Cramârs di Tumieç e sostignût de Fondazione Friuli. Cun cheste propueste, Cramârs e ponte a tirâ dongje e a contâ ce che intant de emergjence dal Covid a àn gjenerât lis piçulis comunitâts di mont, in particolâr se i negozis inmò operatîfs ta chês zonis a puedin deventâ erogadôrs di servizis di welfare pe comunitât locâl. «Tal moment che – e fâs savê Cramârs – une piçule buteghe e devente un volan che al ufrìs servizis ae comunitât di riferiment, il lûc si trasforme: di riferiment comerciâl al devente un “hub di comunitât” dulà che, dongje dal valorizâsi miôr cu lis sôs ativitâts tipichis, e rive a coinvolzi ancje ducj i components dal paîs, lant a gjenerâ altri valôr zontât». In chest moment il progjet finanziât de Fondazione Friuli al à sierât la part des intervistis in Cjargne e tal Tarvisian: cumò si tachin a intervistâ lis piçulis realtâts des valadis des Dolomitis furlanis. Ae fin, dopo altris intervistis di aprofondiment che si laran a fâ tes realtâts plui dinamichis, e saltarà fûr une relazion finâl dal progjet cuntun pâr di indicazions di lâur daûr, dentri di Març dal 2021.
◆ Tal prontâ il progjet, Cramârs si è domandade ce che si intint par “welfare di prossimitât” e in ce relazion che al ven vivût il “welfare istituzionâl” : «Tal meti jù il progjet – a spieghin i referents de cooperative cjargnele – si sin basâts su la concezion che il welfare di prossimitât al è la realizazion di un benstâ di vicinance a integrazion dal benstâ istituzionâl che al è identificât tant che “welfare di distance”. Il welfare di prossimitât al è un welfare di vicinance parcè che al cree une relazion cul utent che al è viodût tant che coprotagonist tal fâ sù la rispueste aes dibisugnis. Al previôt il coinvolziment di une schirie di atôrs come ents publics, altris organizazions e impresis, fameis e rêt relazionâl dai beneficiaris. La vicinance e garantìs capacitât di scolte e e devente gjeneradore di prossimitât a personalizazion alte». ❚