Vincj scuelis coinvolzudis, 1200 insegnants, 950 gjenitôrs, 1300 students, passe 500 oris di ativitât e 60 documents scolastics inzornâts par adeguâ i istitûts des ex provinciis di Udin e Pordenon aes indicazions de leç 71/2017 par fâi cuintri al cyberbulisim. A son un pâr dai risultâts presentâts ai 8 di Otubar te sede de Regjon a Udin, in ocasion de seconde conference anuâl dal progjet “Cittadinanza digitale a scuola”, promovude de Fondazione Friuli in colaborazion cu la associazion Mec.
Te seconde anualitât dal progjet che al larà indenant tal an scolastic corint, il numar dai istitûts al cressarà a 40 e a saran inseridis ativitâts gnovis di progjetazion e di aprofondiment, cul obietîf di slargjâ l’impat dal progjet valorizant la esperience acuiside tal prin an di sperimentazion. «Un dai ponts di fuarce dal progjet – al à dit Giacomo Trevisan, coordenadôr regjonâl de associazion Mec – al è chel di consolidâ la sinergjie jenfri sogjets che in Friûl-Vignesie Julie a son daûr a lavorâ cu lis scuelis sul teme de citadinance digjitâl, coordenant i intervents tra Regjon, Ufici scolastic regjonâl, Fondazione Friuli e altris sogjets privâts. Si ponte a di une progjetazion a tiermin lunc cul inseriment stabil des competencis di citadinance digjitâl te ufierte formative des scuelis».
Dongje dal adeguament dai istitûts aes diretivis di leç sul cyberbulisim si ponte ancje a progjetâ un curriculum verticâl pe citadinance digjitâl, e ae sperimentazion di modalitâts didatichis inovativis come lis strategjiis di intervent fondadis sui principis de justizie di riparazion. Ae conference a son intervignûts il president de Fondazione Friuli Giuseppe Morandini, Giovanni Grandi de Universitât di Padue, Patrizia Pavatti dal Ufici scolastic regjonâl e Ketty Segatti, diretore de aree istruzion, formazion e ricercje de Regjon. Ducj i relatôrs a àn marcât la necessitât di rindi simpri plui funzionâl e capilâr il lavôr cu lis scuelis, coordenant in maniere simpri plui puntuâl lis risorsis disponibilis par rivâ a dutis lis scuelis de regjon e ufrî un supuart coerent cu lis prioritâts dai istitûts. In proposit, la direzion regjonâl e à anunziât la ativazion in vie sperimentâl di une linie drete pal supuart aes scuelis inte gjestion dai problemis leâts al ûs falât des gnovis tecnologjiis: chest al sarà pussibil in gracie dal supuart de Regjon, dal pôl formatîf dal Friûl-Vignesie Julie che al è logât alì dal istitût Manzini di San Denêl e de associazion Mec. ❚
Piero Cargnelutti
