FONDAZIONE FRIULI. Ae Bellavitis laboratoris di sience e di educazion ambientâl

Cul jutori de Fondazione Friuli, ae Bellavitis di Udin a rivin gnûfs laboratoris pai students, che a puedin cussì aprofondî i temis des siencis e dal ambient. O fevelìn dai progjets che a son stâts puartâts indenant inte scuele mezane Bellavitis in vie Riccardo Di Giusto a Udin, che e fâs part dal istitût superiôr 6 de citât. In graciis dai fonts dal bant istruzion metûts a disposizion de Fondazione Friuli, te scuele al è stât pussibil realizâ un laboratori cun ducj i imprescj, tant che microscopis, sensôrs, stampante 3D par studiâ lis siencis: «A son doi locâi – al spieghe il docent Francesco Calderini che al à seguît il progjet – : intun si cjatin i imprescj par aprofondî lis siencis cuntun acuari colegât a sensôrs che a permetin di ricevi dâts su temperadure, su la gradazion de aghe e vie indenant. Ta chel altri locâl si cjatin invezit lis machins leadis ae robotiche, cun struments 3D e similârs. Il laboratori si clame“Steam”, acronim di Science, Technology, Engineering, Art e Mathematics». Il laboratori al è stât finît tai mês passâts e al è a disposizion dai 330 students de scuele mezane ma ancje di chei altris 900 che a frecuentin l’istitût scolastic. In graciis di un gnûf contribût de Fondazione Friuli rivât chest an, il prossim an si realizarà un progjet di educazion ambientâl che si disviluparà tal grant curtîl de scuele: «Cui students – al spieghe simpri Calderini – o disponarìn une stazion biologjiche cun ripârs pai invertebrâts, ma ancje fototrapulis e une stazion meteo. Chescj imprescj a saran colegâts al laboratori dulà che a rivaran i dâts e li che si podaran studiâ e analizâ. O varin ancje il kit dedicât ae energjie sostignibile, cuntun strument par realizâ la eletrolisi e mostrâ ai students cemût che si prodûs la energjie eletriche». La scuele mezane Bellavitis di Udin e veve cjapât ancje un altri contribût de Fondazion Friuli che al è stât doprât par realizâ un gjornalut po dopo imbinât a une edizion de “Panarie”. ❚