Cuant che la natalitât e devente une arme

In tancj paîs si dopre la natalitât tant che une arme. Tra Israêl e Palestine la vuere je ancje demografiche: plui la proprie comunitât e devente grande, plui e sarà al sigûr dai atacs di chê altre. E chestis dinamichis a puartin a situazions come te Striche di Gaza: suntun toc di tiere lunc 40 km e larc 11 si contindin il spazi 1 milion e 800 mil personis. In tancj paîs de Afriche il rispiet par un om al ven di trops fîs che al à. Tirâ sù 17 fîs (intune famee poligame in Nigjerie cheste e je la norme) là  che desertificazion e denutrizion a son tal ordin dal dì, nol à di jessi facil. Cambiâ culture in doi dîs nol è pussibil. Lis religjons (dutis) a spieghin che “Diu ju fâs e po al proviôt” ma al è l’om che al varès di pensâ a une planificazion de demografie prin che al sedi masse tart. Alan Weisman al conte che al Summit de Tiere dal 1992 “il Brasîl, che al ospitave la riunion, par rispiet dai catolics al fasè scancelâ lis espressions “planificazion familiâr” e “contracezion” dal stampon dai acuardis Unced”.
◆ Tirâ vie une part tant impuartante de discussion al jere come fevelâ di balon in Friûl e no nomenâ l’Udin! Paîs une vore leâts ae religjon tant che lis Filipinis a àn vude une incressite incontrolade: intal 1946, an de Indipendence, i abitants e jerin 18 milions, vuê a son 103 milions. Tal 2010, cuant che il neopresident Benigno Aquino III si jere dimostrât favorevul a un dissen di leç su la contracezion, il vescul di Manila lu à menaçât di scomuniche. Lui no si è tirât indaûr e al à aprovade la leç, ma nol à  viert ae legalizazion dal abort, che al continue a jessi praticât in clandestinitât: ogni an si stime che a ‘nt sedin 560.000 e che 90.000 feminis a vedin complicazions e 1.000 a muerin par chest. Al è un fenomen plui mortâl dai atacs teroristics (mancul di 300 muarts ad an) e de fiere dengue (mancul di 250 muarts). Si cjatìn devant di un paradòs: a son feminis “copadis” tal non de riproduzion. No isal miôr prevignî cu la istruzion e il supuart just e, tal câs che no sedin avonde, tutelâ une femine cu la sielte di interompi la gravidance in maniere sigure pluitost che fâ murî jê e il so frut? Il control des nassitis al è une maniere madure di judâ un planet che al sta deventant masse piçul, plui che lassâ che i pensin Diu o la Sience a risolvi problemis che a son ducj umans. ❚