“Fake news”. Vivi e sorevivi tal mont de post-veritât

Intal so libri sul KGB, il gjornalist american John Barron (1974) al conte tal detai cualchi esempli de ativitât dal Dipartiment D – dulà che D al sta par dezinformacija (disinformazion) – e tra chei la «operazion svastiche». La vilie di Nadâl 1959, a son saltadis fûr sui mûrs de sinagoghe di Colonie lis svastichis nazistis dutune cu la scrite «I todescs a domandin che i ebreus a ledin vie». Chest event al à inviât intai doi mês dopo une schirie di plui di 833 compuartaments discriminatoris cuintri i ebreus, gjenerant un fuart sintiment antisemite. Cu la fin de vuere frede e cul la colade dal mûr di Berlin, si è scuviert che daûr di cheste operazion al jere il Dipartiment D, e in particolâr il so comandant, il gjenerâl Ivan Ivanovich Agayantis.
L’episodi ripuartât al è un dai tancj procès di disinformazion che di simpri a son presints inte lote politiche. La espression «fake news» ise dome un gnûf mût par definî chestis pratichis antighis? No, al rispuint Giuseppe Riva, ordenari di Psicologjie de Comunicazion te Universitât Catoliche di Milan.
◆ Lis fake news a son il risultât di un lavôr di inzegnarie comunicative e sociâl dal dut gnûf a pet dal passât e no dome a modifichin la percezion de realtât dal sogjet, ma a son ancje in stât di influençâlu fin al pont di sburtâlu a condividilis in maniere spontanie e partecipade.
◆ Secont il Collins Dictionary, al è dome tacant dal 2015 che il tiermin al ven doprât cul so significât di cumò par indicâ «informazions falsis, dispès sensazionalistichis, difondudis cu la forme di une notizie gjornalistiche». In particolâr, a rindi popolâr il tiermin a son stadis lis elezions americanis dal 2016, culminadis cu la vitorie a sorprese di Donald Trump.
◆ Ma ce diferenzial lis fake news atuâls de disinformazion che e je simpri esistude? Il prin element al è la capacitât di tocjâ la dimension emotive e profonde dal letôr. Il secont al è il lôr leam strent  cuntune tecnologjie: i social media.
◆ I esperts a definissin il spazi sociâl ibrit là che o vivìn di une cuindisine di agns cul tiermin «interrealtât»: chel che o fâs intal mont digjitâl al à une influence direte sul mont fisic e vicevierse, nol impuarte che jo lu vueli o no. In chest ambient, lis fake news – o “bufulis” – si difondin sîs voltis plui sveltis des des notiziis veris.
◆ La proliferazion des fake news e je dovude a carateristichis precisis dal social media. Prin di dut, l social media tant che Facebook a crein silos sociâi, o sedi contignidôrs di utents cun carateristichis sociâls similis, di vendi ai inserzioniscj. I utents impresonâts intai silos a visualizin contignûts selezionâts su la base des preferencis che a àn esprimudis midiant i ‘Mi plâs’. Il risultât a son veris «cassis di risonance» là che i utents si scambiin informazions fasintsi eco un cun chel altri. In secont lûc, in cuindis agns la atenzion medie intant de fruizion dai contignûts digjitâi e je calade dal 50%, passant di 12 seconts a 8 seconts par ogni contignût: un timp fintremai plui bas dai 9 seconts che al pues rivâ un pes ros. Infin, cemût che al à contât Sean Parker, za president di Facebook, i social media a son stâts costruîts par «aprofitâ des vulnerabilitâts de psicologjie umane» cuntun mecanisim che al cree dipendence tant che une droghe.
◆ Cemût sorevivi aes fake news? Il compit plui impuartant nus tocje a nô citadins, che o varessin di impegnâsi par rinfuarçâ il nestri spirt critic, prin di dut disativant il pilote automatic che dispès nus vuide intant che o mateìn sui social. Par fâ chest, si à di controlâ midiant di apps di pueste, disponibilis par iPhone e Android, par trop timp che o doprìn il nestri smartphone: se par une setemane il timp medi intune dì al passe lis trê oris, alore o vin di cirî di ridusilu.
“Fake news” al è un volum cuntune vision ample, ma no tecniche o specialistiche, conseât soredut a cui che al è in prime linie inte bataie cuintri lis bufulis: gjornaliscj e insegnants. In ogni câs, il test al è acessibil a ducj, a ben che i cjapitui centrâi – dedicâts ae formazion des comunitâts digjitâls – a domandin un sfuarç discret di comprension. ❚